ក្នុងរយៈពេល ២ទស្សវត្សរ៍កន្លងមកនេះ គ្មានក្រុមហ៊ុនណាធ្វើបានប្រសើរ ក្នុងការមានឥទ្ធិពលលើកន្លែងការងាររបស់សហរដ្ឋអាមេរិក ជាងក្រុមហ៊ុន Amazon នោះឡើយ។ ក្នុងការបានកា្លយទៅជានិយោជកធំជាងគេទី២ របស់ប្រទេស ក្រុមហ៊ុននេះបានជួលកម្មករឃ្លាំងរាប់សែននាក់ បង្កើតបានក្រុមអ្នកបើកបរកិច្ចសន្យាយ៉ាងធំ ហើយបើកផ្លូវឲ្យមានការប្រើបច្ចេកវិទ្យា ដើម្បីជួល ត្រួតពិនិត្យ និងគ្រប់គ្រងបុគ្គលិក។

ឥឡូវនេះ បទសម្ភាសន៍ និងឯកសារយុទ្ធសាស្ត្រផ្ទៃក្នុងសម្ងាត់ដែលត្រូវបានឃើញដោយសារព័ត៌មាន The New York Times បង្ហាញថា នាយកប្រតិបត្តិ Amazon ជឿថា ក្រុមហ៊ុនកំពុងឈានទៅរកការផ្លាស់ប្តូរកន្លែងការងារដ៏ធំបន្ទាប់របស់ខ្លួន នោះគឺ ការជំនួសការងារជាងកន្លះលានកន្លែង ដោយមនុស្សយន្ត។

កម្លាំងពលកម្មអាមេរិករបស់ក្រុមហ៊ុន Amazon បានមានច្រើនជាង ៣ដង គិតចាប់តាំងពីឆ្នាំ២០១៨ មក ពោលគឺកើនរហូតដល់ជិត ១,២លាននាក់។ ប៉ុន្តែក្រុមស្វ័យប្រវត្តិកម្មរបស់ Amazon រំពឹងថា ក្រុមហ៊ុនអាចជៀសវាងការជួលមនុស្សច្រើនជាង ១៦០.០០០នាក់ នៅសហរដ្ឋអាមេរិក ដែលខ្លួនត្រូវការ នៅឆ្នាំ២០២៧។ ចំណាត់ការនោះ នឹងសន្សំបានប្រហែល ០,៣០ដុល្លារ លើទំនិញមួយមុខៗ ដែលខ្លួនជ្រើសរើស វេចខ្ចប់ និងចែកចាយ។

នៅឆ្នាំ២០២៤ នាយកប្រតិបត្តិបានប្រាប់ក្រុមប្រឹក្សាភិបាលរបស់ក្រុមហ៊ុន Amazon ថា ពួកគេសង្ឃឹមថាស្វ័យប្រវត្តិកម្មមនុស្សយន្ត នឹងអាចឲ្យក្រុមហ៊ុនបន្តជៀសវាងការបន្ថែមកម្លាំងពលកម្ម នៅសហរដ្ឋអាមេរិក ក្នុងប៉ុន្មានឆ្នាំខាងមុខនេះ ទោះបីជាពួកគេរំពឹងថា នឹងលក់ផលិតផលច្រើនជាង ២ដង នៅឆ្នាំ២០៣៣ ក៏ដោយ។

នៅឯទីតាំងដែលត្រូវបានរចនាឡើង សម្រាប់ការចែកចាយលឿនបំផុត ក្រុមហ៊ុន Amazon កំពុងព្យាយាមបង្កើតឃ្លាំងដែលជួលមនុស្សតិចបំផុត។ ហើយឯកសារបង្ហាញថា ក្រុមមនុស្សយន្តរបស់ Amazon មានគោលដៅចុងក្រោយ ក្នុងការធ្វើស្វ័យប្រវត្តិកម្ម ៧៥ភាគរយនៃប្រតិបត្តិការរបស់ខ្លួន៕