ទីភ្នាក់ងារអាកាសធាតុរបស់ប្រទេសនូវែលសេឡង់ បានចេញការព្រមានអំពីខ្យល់ កម្រិតពណ៌ក្រហមដ៏កម្របំផុត ហើយក្រុមមន្ត្រីបានប្រកាសភាពអាសន្នក្នុងតំបន់ Canterbury ខណៈព្យុះនិទាឃរដូវដ៏មានឥទ្ធិពល បាននាំមកនូវភ្លៀងធ្លាក់ដ៏បំផ្លិចបំផ្លាញ និងខ្លាំងក្លា លើកោះខាងត្បូង និងតំបន់ទំនាបនៃកោះខាងជើង នៅថ្ងៃព្រហស្បតិ៍ (២៣ តុលា) នេះ។

ជើងហោះហើរទាំងចូល និងចេញពីរដ្ឋធានីវែលលីងតោន និងតំបន់ Christchurch ក្នុងទីក្រុង Canterbury ទាំងអស់ ត្រូវលុបចោល សេវារថភ្លើងខ្លះក៏ត្រូវផ្អាក ហើយអគាររដ្ឋាភិបាលមួយចំនួនត្រូវបានបិទ។ ទីភ្នាក់ងារដឹកជញ្ជូននូវែលសេឡង់ បានបិទផ្លូវមួយចំនួន ហើយមានការដាច់ចរន្តអគ្គិសនីយ៉ាងទូលំទូលាយ។ រូបភាពប្រព័ន្ធផ្សព្វផ្សាយបង្ហាញឱ្យឃើញនូវការខូចខាតតាមដងផ្លូវ កម្ទេចកម្ទីបែកបាក់ រថយន្តដឹកទំនិញក្រឡាប់ និងការជន់លិចលើតំបន់រងផលប៉ះពាល់។

ទីភ្នាក់ងារអាកាសធាតុនិយាយថា ប្រព័ន្ធអាកាសធាតុធ្ងន់ធ្ងរត្រូវរំពឹងថានឹងបង្កើតខ្យល់ព្យុះកម្លាំងខ្លាំងរហូតដល់ ១៥០គីឡូម៉ែត្រក្នុងមួយម៉ោង ជិតទីក្រុង Christchurch និងនៅតំបន់ទំនាបឆ្នេរនៃកោះភាគខាងត្បូង និងល្បឿនខ្យល់រហូតដល់ ១៤០គីឡូម៉ែត្រក្នុងមួយម៉ោង នៅផ្នែកខ្លះនៃទីក្រុងវែលលីងតោន និង Wairarapa នៅថ្ងៃព្រហស្បតិ៍នេះ ដោយក៏មានភ្លៀងខ្លាំងផងដែរសម្រាប់ផ្នែកនានាទូទាំងប្រទេស។

ការព្រមានពណ៌ក្រហមបែបនេះត្រូវដាក់ចេញតែក្នុងព្រឹត្តិការណ៍អាកាសធាតុធ្ងន់ធ្ងរបំផុតប៉ុណ្ណោះ ហើយអាជ្ញាធរបានស្នើអ្នកស្រុកឱ្យទៅជ្រកកោននៅទីសុវត្ថិភាព ខណៈអគាររដ្ឋាភិបាលដូចជាបណ្ណាល័យ និងឧទ្យាន ត្រូវបានបិទក្នុងតំបន់ដែលរងផលប៉ះពាល់ខ្លាំងបំផុត៕