ប្រព័ន្ធផ្សព្វផ្សាយរដ្ឋ KCNA បានរាយការណ៍នៅថ្ងៃសុក្រ (២៤ តុលា) នេះថា មេដឹកនាំកូរ៉េខាងជើង លោក គីម ជុងអ៊ុន បានលើកឡើងថា ភាតរភាពយោធារវាងប្រទេសកូរ៉េខាងជើង និងភាគីរុស្ស៊ី នឹង "ឈានទៅមុខឥតឈប់ឈរ"។

KCNA និយាយថា លោក គីម បានធ្វើអត្ថាធិប្បាយបែបនេះក្នុងអំឡុងសុន្ទរកថានៅឯពិធីបើកការដ្ឋានមួយកន្លែងដើម្បីសាងសង់ទីរំលឹកវិញ្ញាក្ខន្ធដល់ទាហានកូរ៉េខាងជើង ដែលបានប្រយុទ្ធរួមគ្នាជាមួយទាហានក្រុងមូស្គូ នៅតំបន់ Kursk របស់រុស្ស៊ី ក្នុងអំឡុងសង្រ្គាមដែលកំពុងបន្តជាមួយអ៊ុយក្រែន។

លោក គីម បាននិយាយថា ប៉ុន្មានឆ្នាំនៃភាតរភាពរបស់ភាគីទាំងពីរ ដែលក្នុងនោះការធានាមួយត្រូវបានផ្តល់ជូនសម្រាប់ការអភិវឌ្ឍយូរអង្វែងនៃមិត្តភាពទ្វេភាគីដោយការលះបង់ឈាមស្រស់ដ៏មានតម្លៃ នឹងបន្តរីកចម្រើនទៅមុខឥតឈប់ឈរ នេះបើយោងតាម KCNA។ លោកបន្ថែមថា បញ្ហាប្រឈមនានាមិនអាចរារាំងទំនាក់ទំនងរវាងប្រទេសទាំងពីរបានទេ។

គួរឱ្យដឹងថា ទំនាក់ទំនងយោធារវាងទីក្រុងមូស្គូ និងទីក្រុងព្យុងយ៉ាង បានកើនឡើងខ្លាំងក្នុងប៉ុន្មានឆ្នាំមកនេះ ដោយលោក គីម និងប្រធានាធិបតីរុស្ស៊ី លោក វ្ល៉ាឌីមៀ ពូទីន បានចុះហត្ថលេខាលើកិច្ចព្រមព្រៀងការពារគ្នាទៅវិញទៅមក ហើយកូរ៉េខាងជើងក៏បានបញ្ជូនទាហាន គ្រាប់កាំភ្លើងធំ និងមីស៊ីលទៅកាន់រុស្ស៊ី ដើម្បីគាំទ្រប្រតិបត្តិការយោធារបស់ទីក្រុងមូស្គូ លើអ៊ុយក្រែន៕