សារព័ត៌មាន Reuters បានរាយការណ៍ថា សហរដ្ឋអាមេរិក កំពុងពិចារណាលើសំណើរដើម្បីធ្វើឲ្យប្រសើរប្រតិបត្តិការជំនួយមនុស្សធម៌នៅក្នុងតំបន់ហ្កាហ្សា ដោយជំនួសមូលនិធិមនុស្សធម៌ដែលមានភាពចម្រូងចម្រាស់នៅតំបន់ហ្កាហ្សាគាំទ្រដោយសហរដ្ឋអាមេរិក (GHF)។

ចំណាត់ការនេះ ធ្វើឡើងនៅពេលដែលអង្គការសុខភាពពិភពលោក (WHO) បានព្រមានថាជំនួយទៅកាន់តំបន់ហ៊ុមព័ទ្ធដែលរងការបំផ្លិចបំផ្លាញដោយសង្រ្គាមមួយនេះ នៅតែទាបជាងអ្វីដែលត្រូវការ។

សំណើនេះ ស្ថិតក្នុងចំណោមសំណើរជាច្រើនដែលកំពុងត្រូវបានស្វែងរកដោយទីក្រុងវ៉ាស៊ីនតោន ជាការសំឡឹងមើលវែងឆ្ងាយទៅមុខ «ខ្សែក្រវាត់មនុស្សធម៌តំបន់ហ្កាហ្សា» ដែលត្រូវបានបង្កើតឡើងដោយមជ្ឈមណ្ឌលជំនួយពី១២ ទៅ១៦កន្លែង ដែលមានទីតាំងនៅតាមខ្សែបន្ទាត់ដែលកងកម្លាំងអ៊ីស្រាអែលបានដកខ្លួនចេញក្នុងតំបន់ហ្កាហ្សា។

យោងតាមមន្ត្រីសហរដ្ឋអាមេរិកនិងប្រភពមនុស្សធម៌ដែលដឹងអំពីផែនការ មជ្ឈមណ្ឌលទាំងនោះនឹងបម្រើឲ្យជនស៊ីវិលនៅផ្នែកទាំងសងខាងនៃខ្សែបន្ទាត់។

មជ្ឈមណ្ឌលទាំងនេះនឹងរួមមាន «ទីតាំងសម្របសម្រួលដោយស្ម័គ្រចិត្ត» សម្រាប់ក្រុមសកម្មប្រយុទ្ធក្នុងការប្រគល់អាវុធរបស់ពួកគេជាថ្នូរនឹងការលើកលែងទោស។

មន្ត្រីរដ្ឋបាលជាន់ខ្ពស់អាមេរិកម្នាក់បាននិយាយក្នុងលក្ខខណ្ឌមិនបញ្ចេញឈ្មោះថា «វិធីសាស្រ្តជាច្រើនកំពុងត្រូវបានពិចារណាដើម្បីទទួលបានជំនួយដោយប្រសិទ្ធភាពទៅដល់ប្រជាជនតំបន់ហ្កាហ្សា»។