ប្រធានាធិបតីកូឡុំប៊ីលោក Gustavo Petro និយាយថា ការកាត់ផ្តាច់ជំនួយពីសហរដ្ឋអាមេរិក នឹងមិនធ្វើឲ្យប៉ះពាល់ដល់ប្រទេសរបស់លោកច្រើនប៉ុន្មាននោះទេ ។

 លោកអះអាងថា លោកពុំដែលឃើញជំនួយនៅក្នុងថវិកាកូឡុំប៊ីម្តងណាឡើយ ប៉ុន្តែវាធ្លាក់ទៅលើអង្គការក្រៅរដ្ឋាភិបាលដែលទីភ្នាក់ងារ USAID គ្រប់គ្រងនៅក្រៅរដ្ឋាភិបាល ។ លោកបន្តថា វាជាប្រភេទជំនួយសម្រាប់ការងាររបស់សហរដ្ឋអាមេរិក ។

 ប៉ុន្តែលោក Petro ពិតជាទទួលស្គាល់ថា ការផ្លាស់ប្តូរការផ្តល់មូលនិធិយោធា អាចនឹងមានផលប៉ះពាល់ ។ នៅក្នុងជំនួយយោធា ពួកយើងអាចនឹងមានបញ្ហាមួយចំនួន ពួកយើងហ៊ាននិយាយថា ជំនួយយោធាបម្រើ ដើម្បីចែកចាយអាវុធ ពេលដែលពួកគេត្រូវការ មាននូវឃ្លាំងពេញដោយអាវុធ ។

 កូឡុំប៊ីធ្លាប់ស្ថិតក្នុងចំណោមអ្នកទទួលបានជំនួយសហរដ្ឋអាមេរិកច្រើនជាងគេបំផុតនៅអឌ្ឍគោលខាងលិច ប៉ុន្តែឆ្នាំនេះ ថវិកាបានធ្លាក់ចុះភ្លាមៗ ពេលដែលទីភ្នាក់ងារ USAID ដែលជាដៃជំនួយមនុស្សធម៌រដ្ឋាភិបាលសហរដ្ឋអាមេរិក ត្រូវបានបិទ ។

 លោក Pete Hegseth គឺជារដ្ឋមន្រ្តីការពារជាតិសហរដ្ឋអាមេរិកនិយាយនៅលើបណ្តាញព័ត៌មានសង្គម Xថា រដ្ឋបាលរបស់លោកប្រធានាធិបតី Donald Trump បានដកចេញរួចទៅហើយកិច្ចខិតខំរបស់កូឡុំប៊ីក្នុងការប្រយុទ្ធប្រឆាំងនឹងការជួញដូរគ្រឿងញៀនដែលបើកទ្វារឲ្យមានការកាត់បន្ថយជំនួយបន្ថែមទៀត ។

 លោក Petro បានច្រានចោលការវាយប្រហាររបស់យោធាសហរដ្ឋអាមេរិកលើនាវាក្នុងតំបន់ការ៉ាអ៊ីប ដែលបានសម្លាប់មនុស្សរាប់សិបនាក់ ហើយនិងបញ្ឆេះភាពតានតឹងនៅក្នុងតំបន់ ៕