ចក្រភពអង់គ្លេស នៅថ្ងៃសុក្រ (ទី២៤ ខែតុលា) នេះ បានជំរុញឲ្យសម្ព័ន្ធមិត្តរបស់អ៊ុយក្រែនឈានដល់កិច្ចព្រមព្រៀងប្រើប្រាស់ទ្រព្យសម្បត្តិបង្កករបស់រុស្ស៊ី ដើម្បីធ្វើឲ្យមានប្រៀប នៅពេលមានកិច្ចចរចាសន្តិភាពនាពេលខាងមុខ ខណៈដែលប្រធានាធិបតី លោក Volodymyr Zelenskiy បានទៅដល់ទីក្រុងឡុងដ្រ៍ ដើម្បីពិភាក្សាជាមួយសម្ព័ន្ធមិត្តទាំងនោះ។

ការិយាល័យរបស់លោក Keir Starmer បានឲ្យដឹងថា លោកនាយករដ្ឋមន្ត្រីអង់គ្លេស ក៏នឹងដាក់សម្ពាធដល់ប្រទេស «សម្ព័ន្ធឆន្ទៈរួម» ឲ្យយកប្រេង និងឧស្ម័នរបស់រុស្ស៊ីចេញពីទីផ្សារពិភពលោក ហើយផ្តល់ឲ្យទីក្រុងគីវនូវមីស៊ីលរយៈចម្ងាយឆ្ងាយបន្ថែមទៀត។

គួរដឹងថា មេដឹកនាំសហភាពអឺរ៉ុប (EU) បានព្រមព្រៀងគ្នាកាលពីថ្ងៃព្រហស្បតិ៍ ដើម្បីបំពេញ «តម្រូវការហិរញ្ញវត្ថុបន្ទាន់» របស់អ៊ុយក្រែន សម្រាប់រយៈពេល ២ឆ្នាំខាងមុខ ប៉ុន្តែមិនបានគាំទ្រដល់ផែនការប្រើប្រាស់ទ្រព្យសម្បត្តិបង្កករបស់រុស្ស៊ី ដើម្បីផ្តល់មូលនិធិប្រាក់កម្ចីដ៏ធំដល់ទីក្រុងគីវឡើយ ដោយសារមានកង្វល់ពីសំណាក់ប្រទេសបែលហ្ស៊ិក។

នៅថ្ងៃព្រហស្បតិ៍នោះ លោក Zelenskiy បានស្នើសុំមេដឹកនាំ EU នៅទីក្រុងប្រ៊ុចសែល ឲ្យផ្គត់ផ្គង់មីស៊ីលរយៈចម្ងាយឆ្ងាយ និងប្រើប្រាស់ទ្រព្យសម្បត្តិដែលត្រូវបានផ្អឹបទុក ដើម្បីទិញអាវុធបន្ថែមទៀត។

ជាមួយគ្នានេះ លោកក៏បានស្វាគមន៍ផងដែរ ចំពោះការសម្រេចចិត្តរបស់ប្រធានាធិបតីអាមេរិក លោក Donald Trump ក្នុងការដាក់ទណ្ឌកម្មលើក្រុមហ៊ុនប្រេងដ៏ធំបំផុតចំនួន ២ របស់រុស្ស៊ី ដែលជាកែប្រែយ៉ាងខ្លាំងមិនគួរឲ្យជឿ ដោយសារសប្តាហ៍មុនបានប្រកាសនូវផែនការមានកិច្ចប្រជុំកំពូលជាមួយប្រធានាធិបតីរុស្ស៊ី លោក Vladimir Putin៕