នៅថ្ងៃចន្ទ (ទី២៧ ខែតុលា) នេះ ប្រធានាធិបតីរុស្ស៊ី លោក Vladimir Putin បានចុះហត្ថលេខាលើច្បាប់ ដើម្បីបញ្ចប់កិច្ចព្រមព្រៀងបំផ្លាញចោលសារធាតុភ្លុយតូនីញ៉ូមដែលលែងដំណើរការរួចហើយ ជាមួយសហរដ្ឋអាមេរិក ជាកតិកាសញ្ញាដែលបង្កើតឡើង ក្នុងគោលបំណងរារាំងភាគីទាំង២ កុំឲ្យផលិតអាវុធនុយក្លេអ៊ែរបន្ថែមទៀត។

ចំណាត់ការនេះកើតឡើងនៅពេលដែលទំនាក់ទំនងកាន់តែអាប់អួ រវាងលោក Putin និងប្រធានាធិបតីអាមេរិក Donald Trump ដែលបានបង្ហាញការខកចិត្តកាន់តែខ្លាំងឡើងៗ ចំពោះសមភាគីរុស្ស៊ី ដែលបដិសេធមិនទទួលយកកិច្ចព្រមព្រៀងសន្តិភាព នៅអ៊ុយក្រែន។

លោក Trump បានលុបចោលផែនការមានកិច្ចប្រជុំកំពូលសន្តិភាពជាមួយលោក Putin កាលពីសប្តាហ៍មុន ដោយនិយាយថា វានឹងជា «ការខ្ជះខ្ជាយពេលវេលា» ហើយបានច្រានចោលការកំណត់កាលបរិច្ឆេទឡើងវិញ ប្រសិនបើមេដឹកនាំរុស្ស៊ីមិនបានបញ្ជូនសញ្ញាថា លោកនឹងយល់ព្រមលើកិច្ចព្រមព្រៀងមួយនោះទេ។

គួរបញ្ជាក់ថា កិច្ចព្រមព្រៀងគ្រប់គ្រង និងបំផ្លាញចោលសារធាតុភ្លុយតូនីញ៉ូម ដែលបានចុះហត្ថលេខាក្នុងឆ្នាំ២០០០ និងបានធ្វើវិសោធនកម្ម ក្នុងឆ្នាំ២០១០ បានធ្វើឲ្យទីក្រុងម៉ូស្គូ និងទីក្រុងវ៉ាស៊ីនតោនប្តេជ្ញាចិត្តកាត់បន្ថយការស្តុកសារធាតុភ្លុយតួនីញ៉ូមដ៏ច្រើនសន្ធឹកសន្ធាប់ ក្នុងសម័យសង្គ្រាមត្រជាក់របស់ពួកគេចំនួន ៣៤តោន ហើយប្រើប្រាស់វាសម្រាប់ថាមពលនុយក្លេអ៊ែរជំនួសវិញ។

មន្ត្រីអាមេរិកបានប៉ាន់ប្រមាណថា កិច្ចព្រមព្រៀងនេះ នឹងលុបបំបាត់សារធាតុដែលត្រូវការ ដើម្បីផលិតអាវុធនុយក្លេអ៊ែរប្រហែល ១៧.០០០គ្រាប់៕