​បាល់ទាត់៖ ​ខ្សែបម្រើ​ស្លាប​តោ​ខៀវ Chelsea, Hakim Ziyech សំរេចចិត្ត​លាឈប់​ពី​កាតព្វកិច្ច​ក្រុម​ជំរើសជាតិ​ម៉ា​រ៉ុ​ក​ហើយ​នៅត្រឹម​វ័យ ២៨ឆ្នាំ​ប៉ុណ្ណោះ​។ ​ការសំរេចចិត្ត​បែបនេះ​បន្ទាប់ពី​កីឡាករ​វ័យ ២៨ឆ្នាំ​រូបនេះ​មិន​ស្ថិតក្នុង​ជំរើស​គ្រូបង្វឹក​ម៉ា​រ៉ុ​កលោក Vahid Halilhodzic នៅ Africa Cup of Nations ដែល​ទើប​បញ្ចប់​ថ្មីៗ​នេះ​។

​​Hakim Ziyech បាន​និយាយ​ថា នេះ​គឺជា​ការ​សំរេចចិត្ត​ចុងក្រោយ​របស់គេ​ ថានឹង​មិន​វិល​ត្រលប់​ទៅ​ក្រុម​ជំរើសជាតិ​វិញ​ទេ និង​ងាក​មក​ផ្តោត​អារម្មណ៍​តែមួយ​មុខ​គត់​ជាមួយ​ក្លិប​អាជីព​។​ ​Hakim Ziyech មិនបាន​លេង​ឱ្យ​ក្រុម​ម៉ា​រ៉ុ​ក​តាំងពី​ខែ​មិថុនា​ឆ្នាំមុន​ម្ល៉េះ តាំងពី​បង្ហាញខ្លួន​ចុងក្រោយ​ពេល​ម៉ា​រ៉ុ​ក​ជួបហ្កា​ណា និង​បូ​គី​ណា​ហ្វា​សូ​។ ​​តាំងពី​ពេលនោះ​មក​អតីត​កីឡាករ Ajax រូប​នេះ​មាន​ជម្លោះ​ពាក្យសំដី​ជាមួយ​គ្រូ​បង្វឹក​សញ្ជាតិ​បូ​ស្នៀ Halildhozic ជុំវិញ​ឱកាស​របស់​ខ្លួន​នៅ​ក្រុម​ជំរើសជាតិ​។​ ​រំលឹកថា Ziyech មាន​ដើមកំណើត​នៅ​ទឹកដី​ហូ​ឡង់ និង​បាន​បង្ហាញខ្លួន​ឱ្យ​ក្រុម​ជំរើសជាតិ​ហូ​ឡង់​ជា​ច្រើន​ប្រភេទ​អាយុ មុនពេល​ផ្លាស់ប្តូរ​មក​លេង​ឱ្យ​ក្រុម​ជំរើសជាតិ​ម៉ា​រ៉ុ​កនៅ​ឆ្នាំ​២០១៥ បង្ហាញខ្លួន​បាន ៣៩​ប្រកួត​ស៊ុត​បញ្ចូល​ទី ១៧​គ្រាប់​៕

​អត្ថបទ​៖​នាង សុភា​វុ​ធ