ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ កាលពីរសៀលថ្ងៃទី២៧ តុលា ឆ្នាំ២០២៥ បានអញ្ជើញទទួលជួបជាមួយ លោកស្រី ឃ្យុងណាន់ ផាក (Kyungnan Park) តំណាង និងជានាយិកាប្រចាំប្រទេសនៃកម្មវិធីស្បៀងអាហារពិភពលោក (WFP) ដែល​ប្រព្រឹត្ត​ទៅនៅទីស្តីការក្រសួង។

យោងតាមក្រសួងកសិកម្ម រុក្ខាប្រមាញ់ និងនេសាទ បានឱ្យដឹងក្រោយចប់ជំនួបនេះថា នាឱកាស​នោះ ឯកឧត្តមរដ្ឋមន្រ្តី បានសម្តែងការស្វាគមន៍លោកស្រី ក្នុងការមកបំពេញការងារនៅកម្ពុជា ហើយ​បាន​ពិភាក្សាកិច្ចសហប្រតិបត្តិការដើម្បីលើកកម្ពស់វិស័យស្បៀង និងអាហារូបត្ថម្ភ ព្រមទាំង​ការ​ពិនិត្យ​លទ្ធភាពសហការជាមួយគ្នាក្នុងការបង្កើនគុណភាពអាហារូបត្ថម្ភ សម្រាប់ប្រជាជន និងកុមារកម្ពុជា។

ជាមួយគ្នានេះដែរ ឯកឧត្តមរដ្ឋមន្រ្តី បានលើកឡើងពីការអភិវឌ្ឍន៍សហគមន៍កសិកម្មទំនើប ដែល​បាន​ផ្តល់​អត្ថប្រយោជន៍ជាច្រើនដល់ប្រជាពលរដ្ឋ ជាពិសេស​ភាពងាយស្រួលក្នុងការ​ទទួល​អន្តរាគមន៍ ហើយក្នុងនោះ (WFP) អាចពិនិត្យលទ្ធភាពក្នុងការចូលរួមជួយគាំទ្រ​ភាពធន់នឹង​អាកាស​ធាតុ​របស់​ប្រជាកសិករ​ តាមរយៈគម្រោងធានារ៉ាប់រងផល​ប៉ះពាល់​ការប្រែប្រួល​អាកាស​ធាតុ និងគ្រោះមហន្តរាយ។

ក្រសួងកសិកម្ម បានបញ្ជាក់បន្ថែមថា ជាការឆ្លើយតបរបស់ លោកស្រី ឃ្យុងណាន់ ផាក បានបង្ហាញគោលជំហរបន្តគាំទ្រ និងចូលរួមក្នុងការផ្តល់នូវកម្មវិធីអាហារូបត្ថម្ភ ដល់ប្រជាជន និងកុមារកម្ពុជា និងលើកកម្ពស់ក្នុងការកែប្រែឥរិយាបថ ដើម្បីវិស័យស្បៀងអាហារ និងអាហារូបត្ថម្ភក្នុងប្រទេសកម្ពុជា៕ អត្ថបទ៖ ឈិត បូរ៉ាវី