ក្រុមមន្ត្រីទួរគីបាននិយាយថា រញ្ជួយដីដ៏ខ្លាំងក្លាមួយកម្រិត ៦,១រ៉ិចទ័រ បានអង្រួនភាគខាងលិចប្រទេសទួរគី កាលពីថ្ងៃចន្ទ (២៧ តុលា) បណ្តាលឱ្យអគារយ៉ាងតិចចំនួន៣ ដែលរងខូចខាតក្នុងការរញ្ជួយពីមុន បានបាក់រលំជាថ្មីម្ដងទៀត។ ភ្លាមៗនេះ មិនទាន់មានសេចក្តីរាយការណ៍ពីអ្នកស្លាប់ឡើយ ប៉ុន្តែមន្រ្តីជាន់ខ្ពស់បាននិយាយថា មានអ្នករបួសជាង ២០នាក់។

យោងតាមទីភ្នាក់ងារគ្រប់គ្រងគ្រោះមហន្តរាយ និងគ្រាអាសន្ន AFAD របស់ប្រទេសនេះបានឱ្យដឹងថា គ្រោះរញ្ជួយដីកម្រិត៦,១រ៉ិចទ័រ នោះមានចំណុចកណ្តាលនៅទីប្រជុំជន Sindirgi ក្នុងខេត្ត Balikesir ហើយបានវាយប្រហារពេលយប់ ម៉ោងក្នុងស្រុក ២២:៤៨នាទីថ្ងៃចន្ទ នៅជម្រៅរាក់ ៥,៩៩គីឡូម៉ែត្រ។

គ្រោះរញ្ជួយដី ដែលតាមពីក្រោយដោយរញ្ជួយបន្តបន្ទាប់ជាច្រើនលើកនេះ បានធ្វើឱ្យអ្នកក្រុងអ៊ីស្តង់ប៊ុល និងខេត្តនៅជិតៗនោះដូចជា Bursa, Manisa និង Izmir មានអារម្មណ៍ដឹងពីការញ័ររង្គើនេះផងដែរ។ រដ្ឋមន្ត្រីមហាផ្ទៃ លោក Ali Yerlikaya បាននិយាយថា យ៉ាងហោចណាស់អគារចំនួន ៣កន្លែង ដែលមិនមានអ្នករស់នៅ និងហាងកម្ពស់ពីរជាន់ ១កន្លែង បានដួលរលំនៅក្នុងទីប្រជុំជន Sindirgi ខណៈសំណង់ទាំងនោះបានរងការខូចខាតរួចមកហើយក្នុងការរញ្ជួយដីលើកមុន។

យោងតាមអភិបាលខេត្ត Balikesir លោក Ismail Ustaoglu បាននិយាយថា មនុស្សសរុបចំនួន ២២នាក់ បានរងរបួស ទាក់ទងនឹងហេតុការណ៍នេះ។ អភិបាលស្រុក Sindirgi និយាយថា "រហូតមកដល់ពេលនេះ មិនទាន់មានរបាយការណ៍ពីការស្លាប់ណាមួយនៅឡើយ ប៉ុន្តែមន្រ្តីកំពុងបន្តការវាយតម្លៃ"៕