​បាល់បោះ៖ ​កីឡាករ Devin Booker បាន​បោះ​បញ្ចូល​កន្ត្រក ៣៨​ពិន្ទុ​ម្នាក់ឯង​ជួយ​ឱ្យ Phoenix Suns យកឈ្នះ​ក្រុម​ខ្លាំង Chicago Bulls ១២៧-១២៤ បន្ត​ទំរង់​លេង​ល្អ​របស់ខ្លួន​នៅ​ក្របខណ្ឌ​បាល់បោះ​អាមេរិក NBA​។ ​​កីឡាករ Chris Paul ក៏​រួមចំណែក​ដែរ​ក្នុង​ជ័យជំនះ​នេះ​ដោយ​បោះ​បាន ១៩ពិន្ទុ ១១បាល់​បញ្ជូន ខណៈដែល Jae Crowder បោះ​បាន ១០ពិន្ទុ ១០បាល់​រី​បោ​ន និង ៦បាល់​បញ្ជូន​។

នេះ​ជា​ជ័យជំនះ ៤ប្រកួត​ផ្ទួនៗ​សំរាប់ Phoenix Suns ទៅលើ Chicago Bulls ដែល​បូក​បញ្ចូល​ទាំង​ជ័យជំនះ ២ប្រកួត​រដូវ​កាល​មុន​។ ​នេះ​ក៏​ជា​ជ័យជំនះ​លើក​ទី ១៣ ក្នុង ១៤ប្រកួត​ចុងក្រោយ​ផងដែរ​សំរាប់ Phoenix Suns ដែល​ធ្វើឱ្យ​ពួកគេ​ពន្លាត​ការ​នាំមុខ​ក្នុង​តារាង​ភាគ​ខាង​លិច​ប្រកួត​ឈ្នះ ៤៣ ចាញ់ ១០ ស្រប​ពេល​ដែល Chicago Bulls ធ្លាក់​មក​លេខ ៣ នៅ​តារាង​ភាគ​ខាងកើតប្រកួត​ឈ្នះ ៣៣ ចាញ់ ២១​។

​​ដោយ​ឡែក​ងាក​មក Golden State Warriors បាន​បន្ត​ជ័យជំនះ ៩ប្រកួត​ជាប់​គ្នា​របស់ខ្លួន​ក្រោយ​យកឈ្នះ Oklahoma City Thunders ១១០-៩៨​។ កីឡាករ Klay Thompson បោះ​បាន ២១ពិន្ទុ​ម្នាក់ឯង ខណៈដែល​កីឡាករ​សំខាន់ Stephen Curry បោះ​បាន ១៨ពិន្ទុ ១០បាល់​បញ្ជូន និង ៩បាល់​រី​បោ​ន​។

​​នេះ​ជា​ជ័យជំនះ​ជាប់​គ្នាច្រើន​ប្រកួត​បំផុតរាប់​ពី​ឆ្នាំ២០១៩ ដែល​ពួកគេ​ឈ្នះ ១១ប្រកួត​ជាប់​គ្នា​។ ​​Golden State នៅពេលនេះ​ឈរ​លេខ ២ នៅ​តារាង​ភាគ​ខាងលិច​ប្រកួត​ឈ្នះ ៤១ ចាញ់ ១៣ ខណៈដែល Oklahoma ឈរ​លេខ ១៤ ប្រកួត​ឈ្នះ ១៧ ចាញ់ ៣៦​។ ​ចំណែកឯ​លទ្ធផល​ផ្សេងទៀត​រួមមាន Utah Jazz យកឈ្នះ New York Knicks ១១៣-១០៤, Miami Heat យកឈ្នះ Washington Wizards ១២១-១០០ និង Toronto Raptors យកឈ្នះ Charlotte Hornets ១១៦-១០១៕

​អត្ថបទ​៖​នាង សុភា​វុ​ធ