ភាពចលាចលនៃការធ្វើដំណើរតាមផ្លូវអាកាសរបស់សហរដ្ឋអាមេរិក មានសភាពកាន់តែធ្ងន់ទៅៗ នៅពេលដែលជើងហោះហើរជិត ៧.០០០វ៉ុល ត្រូវបានពន្យារពេលទូទាំងប្រទេស កាលពីថ្ងៃចន្ទ (ទី២៧ ខែតុលា) ដោយការគ្មានបុគ្គលិកគ្រប់គ្រងចរាចរណ៍ផ្លូវអាកាសកើនឡើងខ្លាំង ខណៈដែលការបិទរដ្ឋាភិបាលសហព័ន្ធ ឈានចូលដល់ថ្ងៃទី២៧ ហើយ ។

រដ្ឋបាលអាកាសចរណ៍សហព័ន្ធ (FAA) បានលើកឡើងពីការខ្វះខាតបុគ្គលិក និងបានដាក់ចេញកម្មវិធីពន្យារពេលហោះហើរ ដែលប៉ះពាល់ដល់អាកាសយានដ្ឋាន Newark ក្នុងរដ្ឋ New Jersey ក៏ដូចជាអាកាសយានដ្ឋាន Austin និងអាកាសយានដ្ឋានអន្តរជាតិ Dallas Fort Worth នៅក្នុងរដ្ឋ Texas កាលពីថ្ងៃចន្ទ។ នៅមុននេះ ជើងហោះហើរនៅភាគអាគ្នេយ៍ ត្រូវបានពន្យារពេល ដោយសារតែកង្វះបុគ្គលិកសំខាន់ នៅកន្លែងគ្រប់គ្រងពេលយន្តហោះទៅកៀកអាកាសយានដ្ឋាន (Terminal Radar Approach Control) នៅទីក្រុង Atlanta។

បុគ្គលិកត្រួតពិនិត្យចរាចរណ៍ផ្លូវអាកាសប្រហែល ១៣.០០០នាក់ និងមន្ត្រីរដ្ឋបាលសន្តិសុខដឹកជញ្ជូន ៥០.០០០នាក់ ត្រូវតែធ្វើការដោយគ្មានប្រាក់ឈ្នួល បន្ទាប់ពីការជាប់គាំងផ្នែកថវិកា រវាងប្រធានាធិបតីពីបក្សសាធារណរដ្ឋ លោក Donald Trump និងសមាជិកសភាគណបក្សប្រជាធិបតេយ្យ បាននាំឲ្យមានដំណើរការបិទនេះ។

រដ្ឋបាលរបស់លោក Trump បានព្រមានថា ការរំខានដល់ជើងហោះហើរ នឹងកើនឡើងទៀត ខណៈដែលអ្នកត្រួតពិនិត្យចរាចរណ៍មិនអាចទទួលប្រាក់ខែពេញជាលើកដំបូង នៅថ្ងៃអង្គារនេះ។ កាលពីថ្ងៃអាទិត្យចុងសប្ដាហ៍កន្លងទៅ ជើងហោះហើរជាង ៨.៨០០វ៉ុល ត្រូវបានពន្យារពេល៕