ប្រធានាធិបតីប្រទេសលីបង់ លោក ចូសេហ្វ អោន(Joseph Aoun) បានអំពាវនាវឱ្យបញ្ចប់ការវាយលុករបស់អ៊ីស្រាអែលដែលបានសម្លាប់មនុស្សស្ទើរតែរាល់ថ្ងៃនៅប្រទេសលីបង់ ក្នុងអំឡុងជំនួបនៅទីក្រុង Beirut ជាមួយបេសកជនសហរដ្ឋអាមេរិក លោកស្រី Morgan Ortagus ខណៈអ៊ីស្រាអែលបានបង្កើនការវាយប្រហាររបស់ខ្លួនទៅលើប្រទេសជិតខាងភាគខាងជើងក្នុងរយៈពេលប៉ុន្មានថ្ងៃថ្មីៗនេះ។

អ៊ីស្រាអែល បានទម្លាក់គ្រាប់បែកដដែលៗលើប្រទេសលីបង់ ជាការបំពានជាក់ស្តែងលើបទឈប់បាញ់កាលពីខែវិច្ឆិកា ឆ្នាំ២០២៤ ដែលបានព្យាយាមបញ្ចប់អរិភាពរយៈពេលជាងមួយឆ្នាំ ដែលបានកើនឡើងជាច្រើនខែនៃសង្រ្គាមពេញបន្ទុកជាមួយក្រុមប្រដាប់អាវុធហេសបូឡាលីបង់។ នៅក្នុងខែតុលាតែមួយ ការវាយប្រហាររបស់អ៊ីស្រាអែលបានសម្លាប់មនុស្សជាង២០នាក់នៅក្នុងប្រទេសលីបង់ នេះបើយោងតាមក្រសួងសុខាភិបាលសាធារណៈរបស់ប្រទេស។

សេចក្តីថ្លែងការណ៍ដែលចេញផ្សាយដោយការិយាល័យប្រធានាធិបតីកាលពីថ្ងៃអង្គារបាននិយាយថា លោក Aoun បានស្នើសុំយ៉ាងទទូចទៅកាន់ លោកស្រី Ortagus លើ «តម្រូវការដើម្បីធ្វើឱ្យសកម្មការងារនៃបទឈប់បាញ់របស់គណៈកម្មាធិការត្រួតពិនិត្យអរិភាព ជាពិសេសទាក់ទងនឹងការបញ្ឈប់ការរំលោភបំពានរបស់អ៊ីស្រាអែលដែលនៅតែបន្ត»។ គណៈកម្មាធិការដែលមានសមាជិកប្រាំប្រទេស រួមមានទាំងសហរដ្ឋអាមេរិក និងបារាំង ទទួលបន្ទុកត្រួតពិនិត្យការអនុវត្តបទឈប់បាញ់។ លោកស្រី Ortagus ត្រូវបានគេរំពឹងថានឹងចូលរួមក្នុងកិច្ចប្រជុំរបស់គណៈកម្មាធិការនៅសប្តាហ៍នេះ។ លោក Aoun ក៏បានអះអាងផងដែរថា «តម្រូវការដើម្បីឱ្យប្រជាជននៅភាគខាងត្បូង អាចត្រឡប់ទៅលំនៅឋានរបស់ពួកគេវិញនិងជួសជុលលំនៅឋានដែលខូចខាតជាពិសេសដោយរដូវរងាខិតជិតមកដល់»។ អ៊ីស្រាអែលនិយាយថា ខ្លួនកំពុងកំណត់គោលដៅលើក្រុមហេសបូឡា ប៉ុន្តែពុំបានផ្តល់ភស្តុតាងនោះទេ។ ការិយាល័យសិទ្ធិមនុស្សរបស់អង្គការសហប្រជាជាតិបាននិយាយកាលពីថ្ងៃអង្គារថា ខ្លួនបានផ្ទៀងផ្ទាត់ការសម្លាប់ជនស៊ីវិលចំនួន១១១នាក់ដោយកងកម្លាំងអ៊ីស្រាអែលចាប់តាំងពីបទឈប់បាញ់នៅក្នុងប្រទេសលីបង់។