ភ្នំពេញ ៖ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ស៊ីហ្គេម ២០២៣ ព្រឹកថ្ងៃទី០៩ ខែកុម្ភៈ ឆ្នាំ២០២២នេះ បានរៀបចំសន្និបាតបូកសរុបការងារឆ្នាំ២០២១ និងលើកទិសដៅការងារឆ្នាំ២០២២ - ២០២៣ របស់ខ្លួន ក្រោមអធិបតីភាពដ៏ខ្ពង់ខ្ពស់ សម្តេចពិជ័យសេនា ទៀ បាញ់ ឧបនាយករដ្ឋមន្រ្តី និងជារដ្ឋមន្រ្តីក្រសួងការពារជាតិ ប្រធានគណៈកម្មាធិការជាតិ។ សន្និបាតរយៈពេល ២ ថ្ងៃ នឹងធ្វើការបូកសរុបការងារដែលគណៈកម្មាធិការសម្រេចបាន និងការពិនិត្យលើការងារដែលត្រូវបំពេញបន្ត ឆ្ពោះទៅកាន់ការរៀបចំព្រឹត្តិការណ៍កីឡាអាស៊ីអាគ្នេយ៍ លើកទី៣២ ដែលព្រះរាជាណាចក្រកម្ពុជាកម្ពុជាធ្វើជាម្ចាស់ផ្ទះលើកដំបូង។

ព្រះរាជាណាចក្រកម្ពុជា ក្នុងនាមជាសមាជិករបស់សមាគមប្រជាជាតិអាស៊ីអាគ្នេយ៍ អាស៊ាន មានកិត្តិយស និងមោទនភាពក្នុងការធ្វើជាម្ចាស់ផ្ទះព្រឹត្តិការណ៍កីឡាដ៏មានសារៈសំខាន់របស់អាស៊ានមួយនេះ។ ដូចដែលពាក្យស្លោករបស់ ស៊ីហ្គេមលើកទី៣២ បានដាក់ចេញរួចមកហើយ “កីឡារស់ក្នុងសន្តិភាព - Sports lives in peace” ការធ្វើជាម្ចាស់ផ្ទះរបស់កម្ពុជាឆ្លុះបញ្ចាំងពីគុណតម្លៃនៃសុខសន្តិភាព និងស្ថិរភាព ដែលបានធ្វើឱ្យការអភិវឌ្ឍសព្វបែបយ៉ាងបានកើតឡើង ដែលក្នុងនោះវិស័យកីឡាក៏មិនខុសពីវិស័យផ្សេងៗផងដែរ។ ឯកឧត្តម ហ៊ុន ម៉ានី សូមឆ្លៀតឱកាសនេះ អំពាវនាវឱ្យបងប្អូនប្រជាពលរដ្ឋកម្ពុជា ជាពិសេសកីឡាករ កីឡាការិនី យុវជនស្ម័គ្រចិត្ត ចូលរួមធ្វើឱ្យព្រឹត្តិការណ៍ដ៏ធំមួយនេះទទួលបានជោគជ័យដ៏ត្រចះត្រចង់ និងបន្សល់ទុកនូវស្នាមញញឹម និងអនុស្សាវរីយ៍ល្អៗពីសំណាក់កីឡាករ កីឡាការិនី និងអ្នកចូលរួមពីប្រទេសនានារបស់អាស៊ាន៕ អត្ថបទ ៖ រដ្ឋា