រដ្ឋាភិបាលទីក្រុងហាណូយ បាននិយាយនៅថ្ងៃពុធ (២៩ តុលា) នេះថា ទឹកជំនន់ ដែលបង្កឡើងដោយភ្លៀងធ្លាក់ខ្លាំងក្លាជាច្រើនថ្ងៃ បានសម្លាប់មនុស្សយ៉ាងតិច ៩នាក់ និង ៥នាក់ទៀតបាត់ខ្លួន នៅភាគកណ្តាលប្រទេសវៀតណាម។

សេចក្តីថ្លែងការណ៍របស់រដ្ឋាភិបាលនិយាយថា អ្នកស្លាប់ ៦នាក់ក្នុងចំណោមនោះគឺនៅទីក្រុង Danang ដែលមានឆ្នេរសមុទ្រដ៏ពេញនិយមបំផុតមួយរបស់ប្រទេស និងក្រុងបុរាណ Hoi An។

ទីភ្នាក់ងារគ្រោះមហន្តរាយរបស់ប្រទេសនេះ បាននិយាយក្នុងរបាយការណ៍ដាច់ដោយឡែកមួយថា ទឹកជំនន់ក៏បានជន់លិចផ្ទះសម្បែងជាង ១០៣.០០០ខ្នង ដែលភាគច្រើននៅតំបន់ទេសចរណ៍ធំៗរបស់វៀតណាមគឺក្រុង Hue និង Hoi An ។ នៅក្រុង Hue ឃុំចំនួន៣២ ក្នុងចំណោម ៤០ឃុំ បានរងគ្រោះដោយទឹកជំនន់ ជម្រៅពី ១ទៅ២ម៉ែត្រ។

ទីភ្នាក់ងារព្យាករអាកាសធាតុវៀតណាមព្រមានថា ភ្លៀងធ្លាក់ខ្លាំងនឹងបន្តនៅភាគកណ្តាលប្រទេស ក្នុងពេលពីរថ្ងៃខាងមុខ ដោយទឹកភ្លៀងនៅតំបន់ខ្លះមានកម្រិតលើសពី ៤០០មីលីម៉ែត្រ ចាប់ពីព្រឹកថ្ងៃពុធ រហូតដល់ចុងថ្ងៃព្រហស្បតិ៍សប្ដាហ៍នេះ៕