ក្រុមហ៊ុននានាជុំវិញពិភពលោក បានបង្កើនការរំសាយបុគ្គលិក រាប់ចាប់ពីក្រុមហ៊ុនបច្ចេកវិទ្យាពហុជាតិ Amazon រហូតដល់ក្រុមហ៊ុនអាហារ និងភេសជ្ជៈ Nestle ចំណែកប្រៃសណីយ៍អាមេរិក UPS ក៏បានរឹតត្បិតការចំណាយ ខណៈទំនុកចិត្តរបស់អតិថិជនបានធ្លាក់ចុះ ហើយក្រុមហ៊ុនបច្ចេកវិទ្យាជាច្រើន ដែលផ្តោតលើបញ្ញាសិប្បនិម្មិត AI បានចាប់ផ្តើមជំនួសការងារកម្លាំងមនុស្ស ទៅប្រើស្វ័យប្រវត្តិកម្មវិញ។

យោងតាមតួលេខរបស់សារព័ត៌មានរ៉យទ័របានបង្ហាញថា ក្រុមហ៊ុនអាមេរិកបានប្រកាសកាត់បន្ថយការងារជាង ២៥.០០០កន្លែង ក្នុងខែតុលានេះ ដោយមិនរាប់បញ្ចូលតួលេខ ៤៨.០០០មុខតំណែង របស់ UPS នោះឡើយ ដែលគិតចាប់ពីដើមឆ្នាំ២០២៥ មក។ នៅទ្វីបអឺរ៉ុប ការរំសាយការងារមានសរុប ២០០.០០០តំណែង ដោយក្រុមហ៊ុន Nestlé រ៉ាប់រងតួលេខច្រើនជាងគេដោយការបន្ថយគ្គលិកដល់ទៅ ១៦.០០០នាក់ កាលពីសប្តាហ៍មុន។

តួលេខសេដ្ឋកិច្ចទាំងមូលលើការកាត់បន្ថយការងារនៅមិនទាន់ចេញផ្លូវការទេ ដោយសាររដ្ឋាភិបាលអាមេរិក កំពុងតែបិទទ្វារក្នុងរយៈពេលវែងបំផុតទីពីរក្នុងប្រវត្តិសាស្រ្តរបស់ខ្លួន។ ក្រុមហ៊ុន Amazon បាននិយាយថា ខ្លួននឹងបន្ថយការងាររហូតដល់ ១៤.០០០កន្លែង ពីកម្លាំងសាជីវកម្មរបស់ខ្លួន ដោយចូលរួមជាមួយក្រុមហ៊ុន Target និងស្ថាប័នផ្សេងទៀត ក្នុងការរំសាយបុគ្គលិករាប់ពាន់នាក់។

ហេតុផលសម្រាប់ការបញ្ឈប់ការងារនេះគឺខុសៗគ្នា។ ក្រុមហ៊ុនមួយចំនួនដូចជា Target និង Nestle មាន CEO ថ្មីដែលចង់រៀបចំរចនាសម្ព័ន្ធប្រតិបត្តិការឡើងវិញ។ ចំណែកក្រុមហ៊ុនផ្សេងទៀតកាត់បន្ថយការងារ ដោយសារតែជួបការលំបាកក្នុងការទប់ទល់ពន្ធខ្ពស់ៗរបស់អាមេរិក៕