មុនពេលមានកិច្ចប្រជុំជាលើកដំបូង នៅថ្ងៃព្រហស្បតិ៍ (ទី៣០ ខែតុលា) ពោលគឺជាជំនួបដែលគ្រប់គ្នារង់ចាំជាយូរមកហើយ រវាងមេដឹកនាំកំពូល ២រូប គឺលោក Donald Trump និងលោក Xi Jinping គិតចាប់តាំងពីការវិលត្រឡប់ទៅកាន់តំណែងរបស់ប្រធានាធិបតីអាមេរិក មន្ត្រីពីភាគីទាំង២ បាននិងកំពុងប្រឹងប្រែងធ្វើការយ៉ាងសស្រាក់សស្រាំលើគ្រោងនៃកិច្ចព្រមព្រៀងពាណិជ្ជកម្ម រវាងទីក្រុងវ៉ាស៊ីនតោន និងទីក្រុងប៉េកាំង ដោយវាអាចនឹងក្លាយទៅជាកិច្ចព្រមព្រៀងមួយជួយរម្ងាប់ភាពចលាចលសេដ្ឋកិច្ចសកលជាច្រើនខែ ដែលបណ្តាលមកពីសង្គ្រាមពាណិជ្ជកម្ម រវាងសហរដ្ឋអាមេរិក និងប្រទេសចិន។

គួរដឹងថា មេដឹកនាំទាំង២ មិនធា្លប់បានជួបគ្នាដោយផ្ទាល់នោះឡើយ គិតតាំងពីឆ្នាំ២០១៩ មក។ ចាប់តាំងពីពេលនោះមក សង្រ្គាម នៅអ៊ុយក្រែន និងការកើនឡើងនូវក្ដីបារម្ភ នៅក្នុងទីក្រុងវ៉ាស៊ីនតោន អំពីភាពរីកចម្រើនជឿនលឿនខាងបច្ចេកវិទ្យារបស់ចិន ក៏ដូចជាបញ្ហាយូរអង្វែង ជុំវិញទំនាក់ទំនងអតុល្យភាពផ្នែកពាណិជ្ជកម្ម រវាងសហរដ្ឋអាមេរិក និងចិន បានធ្វើឲ្យចំណងមិត្តភាព រវាងប្រទេសមហាអំណាចទាំង២ ជួបនឹងភាពអាប់អួ។

ហេតុដូច្នេះ កិច្ចប្រជុំកំពូល នាថ្ងៃព្រហស្បតិ៍ នៅខាងក្រៅកិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) នៅទីក្រុងសេអ៊ូល ប្រទេសកូរ៉េខាងត្បូង គឺជាឱកាស ដើម្បីរៀបចំទំនាក់ទំនងរអាក់រអួលនេះឡើងវិញ។

នៅថ្ងៃពុធ (ទី២៩ ខែតុលា) នេះ លោក Trump បាននិយាយទៅកាន់អ្នកសារព័ត៌មាននៅលើយន្តហោះ Air Force One ដោយបញ្ជាក់ថា៖ «ខ្ញុំគិតថា យើងនឹងមានកិច្ចប្រជុំដ៏អស្ចារ្យមួយ ជាមួយលោកប្រធានាធិបតី Xi របស់ប្រទេសចិន ហើយបញ្ហាជាច្រើននឹងត្រូវដោះស្រាយ»។

ក្នុងចំណោមបញ្ហាសំខាន់ផ្សេងៗ របៀបវារៈកម្រិតខ្ពស់នៃកិច្ចប្រជុំ Xi-Trump ទំនងជាពាក់ព័ន្ធនឹងរ៉ែកម្រ។ ការទប់ស្កាត់របស់ចិន លើការផ្គត់ផ្គង់ធនធានរ៉ែសំខាន់ៗ ដែលមានសារៈសំខាន់សម្រាប់ឧស្សាហកម្មអាមេរិក រាប់ចាប់ពីការផលិតរថយន្ត រហូតដល់ឧបករណ៍យោធា គឺជាការមានប្រៀបរបស់ទីក្រុងប៉េកាំង៕