តាមរយៈការបង្ហោះនៅលើបណ្ដាញសង្គម Truth Social នាថ្ងៃពុធ (ទី២៩ ខែតុលា) នេះ ប្រធានាធិបតីសហរដ្ឋអាមេរិក លោក Donald Trump បាននិយាយថា លោកមិនបានមកកាន់ប្រទេសកូរ៉េខាងត្បូង ដើម្បីជួបកាណាដានោះឡើយ ស្របពេលមានជម្លោះពាណិជ្ជកម្ម ជាមួយប្រទេសជិតខាងភាគខាងជើងរបស់សហរដ្ឋអាមេរិក។

បន្ទាប់ពីបានទៅដល់ទីក្រុង Gyeongju មុនកិច្ចពិភាក្សាជាមួយប្រធានាធិបតីកូរ៉េខាងត្បូង និងចិន ក្នុងចំណោមមេដឹកនាំផ្សេងទៀតនោះ លោកបានសរសេរភ្លាមៗថា៖ «សម្រាប់អ្នកដែលសួរ យើងមិនបានមកកូរ៉េខាងត្បូង ដើម្បីជួបកាណាដាទេ!»។ 

នៅយប់ថ្ងៃពុធនេះ លោក Trump គ្រោងនឹងចូលរួមពិធីជប់លៀងអាហារពេលល្ងាចជាក្រុម ដែលភ្ញៀវរួមមានទាំងនាយករដ្ឋមន្ត្រីកាណាដា លោក Mark Carney ផងដែរ។ កាលពីថ្ងៃចន្ទ លោក Carney បាននិយាយថា លោកបានត្រៀមខ្លួនជាស្រេច ដើម្បីអង្គុយចុះចរចាពាណិជ្ជកម្មជាមួយលោក Trump ឲ្យបានឆាប់តាមដែលប្រធានាធិបតីអាមេរិក បានត្រៀមខ្លួនធ្វើដូច្នេះ។

គួរបញ្ជាក់ថា កាលពីសប្តាហ៍មុន លោក Trump បានប្រកាសថា លោកកំពុងបញ្ចប់កិច្ចពិភាក្សាពាណិជ្ជកម្មជាមួយទីក្រុង Ottawa ហើយបានប្រកាសអត្រាពន្ធបន្ថែម ១០ភាគរយ លើទំនិញនាំចូលពីប្រទេសកាណាដា បន្ទាប់ពីការផ្សាយនយោបាយ នៅខេត្ត Ontario របស់កាណាដា បានប្រើប្រាស់រូបភាពនៃរូបតំណាងរបស់គណបក្សសាធារណរដ្ឋ និងអតីតប្រធានាធិបតី លោក Ronald Reagan អមដោយបញ្ជាក់ថា ពន្ធនាំឲ្យកើតមានសង្រ្គាមពាណិជ្ជកម្ម និងគ្រោះមហន្តរាយសេដ្ឋកិច្ច៕