ក្នុងឱកាសអញ្ជើញដឹកនាំគណៈប្រតិភូរដ្ឋសភាកម្ពុជា ចូលរួមសន្និសីទសភាអន្តរជាតិរំលឹកខួបលើកទី៣០ នៃការអនុម័តរដ្ឋធម្មនុញ្ញនៃសាធារណរដ្ឋអាស៊ែបៃហ្សង់ នៅទីក្រុងបាគូ ប្រទេសអាស៊ែបៃហ្សង់ នាព្រឹកថ្ងៃទី២៩ ខែតុលា ឆ្នាំ២០២៥ ឯកឧត្តម វង សូត អនុប្រធានទី២ រដ្ឋសភា នៃព្រះរាជាណាចក្រកម្ពុជា រួមទាំងគណៈប្រតិភូសភាជាច្រើនផ្សេងទៀត បានអញ្ជើញដាក់កម្រងផ្កាគោរពវិញាណក្ខន្ធ ឯកឧត្តម Heydar Aliyev ដែលជាវីរបុរសជាតិ និងយុទ្ធជនដែលបានធ្វើពលីកម្មដើម្បីបុព្វហេតុជាតិ។ 

ពិធីដាក់កម្រងផ្កា និងគោរពវិញាណក្ខន្ធនេះ បានប្រព្រឹត្តិទៅនៅទីតាំងបញ្ចុះសព្វរបស់អតីតប្រធានាធិបតី Haydar Aliyev និងវិមាននៃការចងចាំ Eternal Flame memorial monument។ 

គួររំលឹកថា អតីតប្រធានាធិបតី Haydar Aliyev ត្រូវបានចាត់ទុកជាឥស្សរជនជាតិដែលបានដឹកនាំតស៊ូទាមទារបានឯករាជ្យភាពពេញលេញសម្រាប់អាស៊ែបៃហ្សង់ និងជាអ្នកតាក់តែងរដ្ឋធម្មនុញ្ញឆ្នាំ១៩៩៥ សម្រាប់អាស៊ែបៃហ្សង់សម័យទំនើប ដែលបានប្រើប្រាស់រហូតដល់សព្វថ្ងៃ ដើម្បីបន្តធានាបានឯករាជ្យភាព អធិបតេយ្យភាព បូរណភាពទឹកដី និងប្រជាធិបតេយ្យ សម្រាប់សាធារណរដ្ឋអាហ្សែបៃហ្សង់។ 

ក្នុងនាមរដ្ឋសភានៃព្រះរាជាណាចក្រកម្ពុជា ឯកឧត្តម អនុប្រធានទី២ រដ្ឋសភា បានសម្តែងនូវគោរពយ៉ាងជ្រាលជ្រៅ ចំពោះវិញ្ញាណក្ខន្ធរបស់វីរជន និងវីរនារី នៃសាធារណរដ្ឋអាស៊ែបៃហ្សង់ ដែលបានពលីជីវិត ដើម្បីឯករាជ្យភាព និងសេរីភាពសម្រាប់ប្រជាជាតិទាំងមូល៕