ក្រុមអាជ្ញាធរ នៅថ្ងៃព្រហស្បតិ៍ (ទី៣០ ខែតុលា) នេះ បានឲ្យដឹងថា អវកាសយានិក សម្រាប់ការហោះហើរមានមនុស្សបន្ទាប់របស់ប្រទេសចិនទៅកាន់ស្ថានីយអវកាស Tiangong នឹងរួមបញ្ចូលអវកាសយានិកវ័យក្មេងបំផុតមិនធ្លាប់មានរបស់ប្រទេស ដើម្បីបំពេញបេសកកម្មអវកាស ព្រមទាំងសត្វកណ្តុរមន្ទីរពិសោធន៍ចំនួន ៤ក្បាលផងដែរ។

អ្នកនាំពាក្យទីភ្នាក់ងារអវកាសចិន (CMSA) លោក Zhang Jingbo បាននិយាយថា បេសកកម្មយាន Shenzhou-21 គ្រោងនឹងហោះឡើងនៅវេលាម៉ោង ១១:៤៤យប់ ម៉ោងក្នុងស្រុក នៅថ្ងៃទី៣១ ខែតុលា ពីមជ្ឈមណ្ឌលបាញ់បង្ហោះផ្កាយរណប Jiuquan នៅភាគពាយព្យប្រទេសចិន។

ស្ថានីយអវកាស Tiangong ដែលមានក្រុមអវកាសយានិក ៣នាក់ ត្រូវបានផ្លាស់ប្តូរគ្នារៀងរាល់ ៦ខែម្តង គឺជាទីតាំងដ៏មានតម្លៃបំផុតនៃកម្មវិធីអវកាសរបស់ប្រទេសចិន ដែលទឹកប្រាក់រាប់ពាន់លានដុល្លារត្រូវបានចំណាយ ក្នុងកិច្ចប្រឹងប្រែង ដើម្បីតាមឲ្យទាន់សហរដ្ឋអាមេរិក និងរុស្ស៊ី។

ក្រុមអវកាសយានិកនេះ នឹងដឹកនាំដោយអ្នកបើកយានអវកាសជើងចាស់ លោក Zhang Lu ដែលបានចូលរួមក្នុងបេសកកម្ម Shenzhou-15 កាលពីជាង ២ឆ្នាំមុន។ លោកនឹងដឹកនាំអ្នកជំនាញផ្នែកបន្ទុក លោក Zhang Hongzhang និងវិស្វករហោះហើរ លោក Wu Fei សម្រាប់ការហោះហើរអវកាសលើកដំបូងរបស់ពួកគេ។

អាជ្ញាធរបានប្រាប់ថា លោក Wu ដែលទើបតែមានអាយុ ៣២ឆ្នាំ នឹងត្រូវក្លាយជាអវកាសយានិកវ័យក្មេងបំផុតរបស់ចិន ដែលបំពេញបេសកកម្មនៅទីអវកាស គិតរហូតមកដល់បច្ចុប្បន្ននេះ។ អ្នកនាំពាក្យ CMSA លោក Zhang បាននិយាយថា បេសកកម្មនេះ ក៏រួមមានសត្វកណ្ដុរ ៤ក្បាលផងដែរ ឈ្មោល ២ក្បាល និងញី ២ក្បាល ដែលនឹងក្លាយជាកម្មវត្ថុនៃការពិសោធន៍លើកដំបូង នៅក្នុងគន្លងតារាវិថីរបស់ចិន ពាក់ព័ន្ធនឹងសត្វកណ្ដុរ