ប្រធានាធិបតីអ៊ុយក្រែន លោក Volodymyr Zelenskyy បាននិយាយកាលពីថ្ងៃព្រហស្បតិ៍ (៣០ តុលា) ដោយដកស្រង់ការប៉ាន់ស្មានរបស់ទីក្រុងគីវថា ទណ្ឌកម្មពីសម្ព័ន្ធមិត្តលោកខាងលិចរបស់អ៊ុយក្រែន នាពេលថ្មីៗនេះ លើក្រុមហ៊ុនប្រេងខ្នាតយក្សរបស់រុស្ស៊ី ត្រូវបានគេព្យាករថា នឹងធ្វើឱ្យទីក្រុងមូស្គូ ខាតបង់យ៉ាងហោចណាស់ ៥០ពាន់លានដុល្លារអាមេរិក ក្នុងមួយឆ្នាំ។

សម្ព័ន្ធមិត្តលោកខាងលិចរបស់ទីក្រុងគីវ បានបង្កើនសម្ពាធលើវិស័យប្រេង និងឧស្ម័នរបស់រុស្ស៊ី ក្នុងខែនេះ ដោយផ្តាច់ចរន្តប្រាក់ចំណូលសំខាន់ៗរបស់ទីក្រុងមូស្គូ។ សហរដ្ឋអាមេរិក កាលពីសប្តាហ៍មុន បានដាក់ទណ្ឌកម្មលើក្រុមហ៊ុនប្រេង Rosneft និង Lukoil ធំជាងគេទាំងពីររបស់រុស្ស៊ី ក្នុងបំណងវាយប្រហារលើក្បាលម៉ាស៊ីនហិរញ្ញវត្ថុ ដែលទ្រទ្រង់សង្រ្គាមនៅអ៊ុយក្រែន។ 

កាលពីដើមខែនេះ ក្រុមហ៊ុនរុស្ស៊ីទាំងពីរ ដែលរួមគ្នា បាននាំចេញប្រេង ៣,១លានបារ៉ែល ក្នុងមួយថ្ងៃ ក៏ត្រូវដាក់ទណ្ឌកម្មដោយចក្រភពអង់គ្លេសផងដែរ។ លើសពីនេះទៀត សហភាពអឺរ៉ុបបានអនុម័តកញ្ចប់ទណ្ឌកម្មទី១៩ កាលពីសប្តាហ៍មុន ផ្តោតលើការឈប់នាំចូលឧស្ម័នធម្មជាតិរាវពីរុស្ស៊ី។

ដោយសម្អាងដល់ការវាយតម្លៃចារកម្មអ៊ុយក្រែន លោក Zelenskyy បានបង្ហោះលើប្រព័ន្ធផ្សព្វផ្សាយសង្គម X ថា៖ វិធានការដាក់សម្ពាធកំពុងចាប់ផ្តើមប៉ះពាល់ដល់ក្បាលម៉ាស៊ីនសង្រ្គាមទីក្រុងមូស្គូហើយ។ ការដាក់ទណ្ឌកម្មប្រឆាំងនឹងក្រុមហ៊ុនប្រេង កំពុងបណ្តាលឱ្យមានការខាតបង់យ៉ាងសំខាន់សម្រាប់រុស្ស៊ី។ លោកបន្តថា "ប្រសិនបើសម្ពាធជាគោលការណ៍ និងជាប់លាប់លើទីក្រុងមូស្គូ នៅតែបន្ត នោះការខាតបង់របស់ពួកគេពីវិធានការថ្មីៗនេះ នឹងមានយ៉ាងហោចណាស់ ៥០ពាន់លានដុល្លារ ក្នុងមួយឆ្នាំ"៕