កាសែត Financial Times (FT) បានរាយការណ៍នៅថ្ងៃសុក្រ (៣១ តុលា) នេះថា សហរដ្ឋអាមេរិក បានលុបចោលកិច្ចប្រជុំកំពូលដែលគ្រោងទុកនៅទីក្រុងប៊ុយដាប៉ែស ប្រទេសហុងគ្រី រវាងលោកប្រធានាធិបតីអាមេរិក Donald Trump និងសមភាគីរុស្ស៊ី លោក Vladimir Putin បន្ទាប់ពីទីក្រុងមូស្គូ បានបញ្ជូនសារបញ្ជាក់ជំហរម៉ឺងម៉ាត់របស់ខ្លួនលើការទាមទារយ៉ាងរឹងរូសទាក់ទងនឹងអ៊ុយក្រែន។

FT និយាយដោយសម្អាងដល់ប្រភពដែលដឹងពីបញ្ហានេះថា ការសម្រេចចិត្តលុបជំនួប ក៏បានធ្វើឡើងបន្ទាប់ពីកិច្ចសន្ទនាតាមទូរសព្ទដ៏តានតឹងរវាងប្រមុខការទូតនៃប្រទេសទាំងពីរ។ របាយការណ៍នេះមិនទាន់អាចត្រូវបញ្ជាក់ភា្លមៗទេ ហើយសេតវិមាន និងភាគីរុស្ស៊ី ក៏មិនបានអត្ថាធិប្បាយដែរ។

ផែនការសម្រាប់កិច្ចប្រជុំកំពូលលើកទី២ នៅទីហុងគ្រី ក្នុងខែតុលា រវាងលោក Trump និងលោក Putin ត្រូវបានផ្អាក ហើយមន្រ្តីអាមេរិកបង្ហើបថា ទីក្រុងមូស្គូនៅតែទទូចលើកសារទាមទាររបស់ខ្លួន រួមទាំងការឱ្យអ៊ុយក្រែនប្រគល់ទឹកដីបន្ថែមទៀត ជាលក្ខខណ្ឌសម្រាប់បទឈប់បាញ់។

សេចក្ដីរាយការណ៍របស់ FT លើកឡើងថា ប៉ុន្មានថ្ងៃបន្ទាប់ពីលោក Trump និងលោក Putin យល់ព្រមជួបគ្នានៅរដ្ឋធានីហុងគ្រី ដើម្បីពិភាក្សាពីវិធីបញ្ចប់សង្រ្គាមនៅអ៊ុយក្រែន ក្រសួងការបរទេសរុស្ស៊ី បានផ្ញើអនុស្សរណៈមួយទៅកាន់ទីក្រុងវ៉ាស៊ីនតោន ដោយគូសបញ្ជាក់ពីការទាមទារដដែលៗ ដើម្បីដោះស្រាយនូវអ្វីដែលលោក Putin ហៅថា “មូលហេតុឬសគល់” នៃជម្លោះ ដែលរួមមានសម្បទានទឹកដី ការបន្ថយទំហំកម្លាំងប្រដាប់អាវុធអ៊ុយក្រែន និងធានាថា ទីក្រុងគីវនឹងមិនចូលសម្ព័ន្ធយោធាណាតូ ឡើយ៕