រដ្ឋមន្ត្រីការពារជាតិសហរដ្ឋអាមេរិក លោក Pete Hegseth បាននិយាយនៅថ្ងៃសុក្រ (៣១ តុលា) នេះថា ទីក្រុងវ៉ាស៊ីនតោន បានចុះហត្ថលេខាលើកិច្ចព្រមព្រៀងក្របខណ្ឌការពារជាតិរយៈពេល ១០ឆ្នាំ ជាមួយនឹងប្រទេសឥណ្ឌា។

បន្ទាប់ពីកិច្ចប្រជុំជាមួយសមភាគីឥណ្ឌារបស់ខ្លួនគឺលោក Rajnath Singh ខាងក្រៅជំនួបក្រៅផ្លូវការនៃរដ្ឋមន្រ្តីការពារជាតិអាស៊ាន-ឥណ្ឌា នៅម៉ាឡេស៊ី — លោក Hegseth បានបង្ហោះលើបណ្ដាញសង្គម X ថា៖ ក្របខណ្ឌនេះត្រូវបានចាត់ទុកថាជាមូលដ្ឋានគ្រឹះសម្រាប់ស្ថិរភាព និងប្រតិបការទប់ស្កាត់ក្នុងតំបន់ បង្កើនការសម្របសម្រួល ការចែករំលែកព័ត៌មាន និងកិច្ចសហប្រតិបត្តិការបច្ចេកវិទ្យារវាងប្រជាជាតិទាំងពីរ។

កិច្ចប្រជុំរវាងប្រមុខការពារជាតិអាមេរិក-ឥណ្ឌានេះ ធ្វើឡើងតែប៉ុន្មានថ្ងៃប៉ុណ្ណោះបន្ទាប់ពីរដ្ឋមន្ត្រីការបរទេសឥណ្ឌា-អាមេរិក ក៏បានជួបប្រជុំគ្នានៅខាងក្រៅជំនួបកំពូលអាស៊ីបូព៌ាក្នុងទីក្រុងគូឡាឡាំពួរ។

កិច្ចប្រជុំកម្រិតខ្ពស់ទាំងនេះ រវាងមន្ត្រីឥណ្ឌា និងអាមេរិក កើតឡើងស្របពេលភាពតានតឹងនៃភាគីទាំងពីរ និងកិច្ចចរចាពាណិជ្ជកម្មដែលកំពុងតែបន្ត ជុំវិញជំហានរបស់លោកប្រធានាធិបតី Donald Trump ក្នុងការដំឡើងពន្ធទ្វេដងលើទីក្រុងញូវដែលី ដោយសារការទិញប្រេងពីរុស្ស៊ី៕