បុគ្គលិកក្នុងតំបន់របស់អង្គការសហប្រជាជាតិ (UN) ដែលត្រូវបានឃុំខ្លួនចំនួន ៤៣នាក់ នឹងត្រូវប្រឈមនឹងការកាត់ទោសពីបទសង្ស័យថា មានទំនាក់ទំនងទៅនឹងការវាយប្រហារតាមអាកាសរបស់អ៊ីស្រាអែលដែលបានសម្លាប់មេដឹកនាំជាន់ខ្ពស់របស់ក្រុមហ៊ួទី កាលពីខែសីហា។ នេះបើតាមការឲ្យដឹងពីរដ្ឋមន្ត្រីការបរទេស ស្តីទីនៃរដ្ឋាភិបាលក្រុមហ៊ួទី នៅប្រទេសយេម៉ែន គឺលោក Abdulwahid Abu Ras ដែលបានប្រាប់សារព័ត៌មាន Reuters។

កាលពីខែសីហា នាយករដ្ឋមន្ត្រីនៃរដ្ឋាភិបាលដឹកនាំដោយក្រុមហ៊ួទី គាំទ្រដោយអ៊ីរ៉ង់ និងរដ្ឋមន្ត្រីមួយចំនួនទៀត ត្រូវបានសម្លាប់នៅក្នុងការវាយប្រហាររបស់អ៊ីស្រាអែលលើរដ្ឋធានីសាណា ដែលជាប្រតិបត្តិការលើកដំបូង ដើម្បីសម្លាប់មន្ត្រីជាន់ខ្ពស់របស់ក្រុមនេះ។

UN បានច្រានចោលការចោទប្រកាន់របស់ក្រុមហ៊ួទី ដែលថា បុគ្គលិករបស់ខ្លួន ឬប្រតិបត្តិការរបស់ខ្លួន ក្នុងប្រទេសយេម៉ែន មានជាប់ពាក់ព័ន្ធនឹងការវាយប្រហាររបស់អ៊ីស្រាអែលស។

យ៉ាងណាក្ដី លោក Abu Ras បាននិយាយនៅក្នុងបទសម្ភាសន៍ជាមួយសារព័ត៌មាន Reuters ថា៖ «ចំណាត់ការដែលធ្វើឡើងដោយភ្នាក់ងារសន្តិសុខ ត្រូវបានអនុវត្តក្រោមការត្រួតពិនិត្យពេញលេញរបស់តុលាការ។ ការកាត់ទោសជាសាធារណៈ ត្រូវបានបន្តផ្ដល់ព័ត៌មានរៀងរាល់ការមានវិធានការគ្រប់ដំណាក់កាល»។

លោកបានបន្តថា៖ «ហេតុដូច្នេះ ដរាបណាអយ្យការទទួលបានព័ត៌មាន វាគឺប្រាកដណាស់ថា ដំណើរការនេះ កំពុងឆ្ពោះទៅរកការសន្និដ្ឋាន ដោយនាំឲ្យមានការជំនុំជម្រះ និងការចេញសេចក្តីសម្រេចរបស់តុលាការ»។

យោងតាម UN បានឲ្យដឹងថា យ៉ាងហោចណាស់បុគ្គលិក ៥៩នាក់ កំពុងត្រូវបានឃុំខ្លួនដោយក្រុមហ៊ួទី ហើយស្ថាប័នបានថ្កោលទោសនូវអ្វីដែលខ្លួនចាត់ទុកថា ជាការចាប់ឃុំខ្លួនដោយបំពាន និងបានអំពាវនាវឲ្យមានការដោះលែងបុគ្គលិករបស់ខ្លួន និងអ្នកជាប់ឃុំដទៃទៀតជាបន្ទាន់៕