មន្ត្រីជាន់ខ្ពស់នៃលេខាធិការដ្ឋានកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) បានឲ្យដឹងថា បណ្ដាប្រទេសអាស៊ី-ប៉ាស៊ីហ្វិកភាគច្រើន ចង់បាន និងកំពុងតម្រង់ទៅកាន់ទិសដៅនៃការមានពាណិជ្ជកម្មសេរី និងបើកចំហ ខណៈដែលពន្ធគយរបស់ប្រធានាធិបតីអាមេរិក លោក Donald Trump បានគ្របដណ្តប់លើកិច្ចប្រជុំកំពូលប្រចាំឆ្នាំរបស់វេទិកានេះ។

នាយកអង្គភាពគាំទ្រគោលនយោបាយ លោក Carlos Kuriyama បានប្រាប់សារព័ត៌មាន Reuters នៅថ្ងៃសុក្រ (ទី៣១ ខែតុលា) នេះថា លោកមានទំនុកចិត្តថា កិច្ចប្រជុំកំពូល នឹងឈានដល់ការប្រកាសរួម ដោយបានកត់សម្គាល់ថា ប្រទេសសមាជិកទាំងអស់ ក្នុងនោះមានរួមទាំងសហរដ្ឋអាមេរិកផងដែរ កំពុងប្រឹងប្រែងធ្វើការយ៉ាងខ្លាំងដោយឥតសម្រាក។

លោក Kuriyama បាននិយាយថា៖ «ខ្ញុំគិតថា សមាជិកច្រើនរបស់ APEC បន្តជំរុញគាំទ្រឲ្យមានពាណិជ្ជកម្មសេរី។ យើងបានឮប្រធានាធិបតី និងនាយករដ្ឋមន្ត្រី ក៏ដូចជាមេដឹកនាំសេដ្ឋកិច្ចមួយចំនួន បានលើកឡើងយ៉ាងដូច្នេះ នៅមុននេះ (នៅឯវេទិកា)»។

គួរបញ្ជាក់ថា កិច្ចសម្ភាសន៍នេះត្រូវបានធ្វើឡើងនៅខាងក្រៅកិច្ចប្រជុំប្រចាំឆ្នាំ នៅទីក្រុង Gyeongju ប្រទេសកូរ៉េខាងត្បូង បន្ទាប់ពីមេដឹកនាំនៃប្រទេសសមាជិកចំនួន ២១ របស់ប្លុកនេះ បានចូលរួមសម័យប្រជុំដំបូងនៃកិច្ចប្រជុំកំពូលរយៈពេល ២ថ្ងៃដែលត្រូវបញ្ចប់នៅថ្ងៃសៅរ៍ចុងសប្ដាហ៍នេះ។

ដោយបានលើកឡើងពីកិច្ចព្រមព្រៀងពាណិជ្ជកម្ម រវាងប្រទេសចិន និងប្លុកអាស៊ាន (សមាគមប្រជាជាតិអាស៊ីអាគ្នេយ៍) ដែលត្រូវបានធ្វើឲ្យប្រសើរឡើងកាលពីដើមសប្តាហ៍នេះ លោក Kuriyama បានបញ្ជាក់ថា៖ «អ្នកអាចមើលឃើញថា សមាជិក APEC ភាគច្រើន ពិតជាកំពុងឆ្ពោះទៅរកទិសដៅនៃការមានពាណិជ្ជកម្មសេរី និងបើកចំហ»៕