សារព័ត៌មាន CNN បានរាយការណ៍នៅថ្ងៃសៅរ៍ (១ វិច្ឆិកា) នេះថា អស់ជាង ១យខែបន្ទាប់ពីលោកប្រធានាធិបតីអាមេរិក Donald Trump ប្រកាសបទឈប់បាញ់នៅតំបន់ហ្កាហ្សា ធាតុផ្សំសំខាន់នៃផែនការសន្តិភាពរបស់លោក មិនទាន់សម្រេចបាននៅឡើយទេ។ ផែនការ ២០ចំណុចនេះ អំពាវនាវឱ្យមានកងកម្លាំងពហុជាតិ ដើម្បីរក្សាលំនឹងស្ថិរភាពនៅហ្កាហ្សា ប៉ុន្តែអ្នកចូលរួមដែលអាចកើតមានក្នុងកងកម្លាំងនេះបាននិយាយថា ពួកគេកំពុងរង់ចាំចម្លើយមុនពេលធ្វើការប្តេជ្ញាចិត្ត ខណៈព័ត៌មានលម្អិតសំខាន់ៗពីដែនសម្ថកិច្ចរបស់កម្លាំងនេះ នៅតែស្រពេចស្រពិល។

លោក Trump បានប្រកាសពីផែនការបញ្ចប់សង្រ្គាមហ្កាហ្សា នៅថ្ងៃទី២៩ ខែកញ្ញា ដោយនិយាយថា កងកម្លាំងស្ថេរភាពអន្តរជាតិ ឬហៅថា ISF ត្រូវរំពឹងថានឹងដាក់ពង្រាយ "ភ្លាមៗ" ដើម្បី បណ្តុះបណ្តាលនគរបាលប៉ាឡេស្ទីន ធានាព្រំដែនជាមួយអ៊ីស្រាអែលនិងអេហ្ស៊ីប រារាំងលំហូរសព្វាវុធ និងអនិញ្ញាតឱ្យមានការដកទ័ពអ៊ីស្រាអែលបន្ថែមទៀតចេញពីតំបន់ហ្កាហ្សា។

ដំណាក់កាលដំបូងនៃបទឈប់បាញ់ ពាក់ព័ន្ធនឹងការដោះលែងចំណាប់ថ្នូរពីតំបន់ហ្កាហ្សា ដោះដូរនឹងអ្នកទោសប៉ាឡេស្ទីន និងអ្នកជាប់ឃុំពីអ៊ីស្រាអែល។ ដំណាក់កាលទីពីរនៃផែនការរបស់លោក Trump ទាមទារឱ្យមានការបង្កើតកងកម្លាំង ISF ។

ក្រុមមន្ត្រីអាមេរិក បានបង្ហើបពីលទ្ធភាពនៃអ្នករួមចំណែកជាច្រើន ហើយប្រទេសមួយចំនួនទៀតក៏បានសម្តែងការចាប់អារម្មណ៍ ប៉ុន្តែមកទល់ពេលនេះ ពុំមានប្រជាជាតិណាមួយប្រកាសជាផ្លូវការពីការចូលរួមនោះទេ។ អ្នកចូលរួមដែលអាចទៅរួចទាំងនោះ កំពុងស្វះស្វែងរកភាពច្បាស់លាស់ និងការធានា មុនពេលបញ្ជូនកងទ័ពពួកគេទៅហ្កាហ្សា ដែលឥឡូវនេះ កំពុងប្រឈមនឹងកងជីវពលប្រដាប់អាវុធ ក្រុមឧក្រិដ្ឋជន និងការគំរាមកំហែងនៃការវាយប្រហាររបស់អ៊ីស្រាអែល ជុំវិញការរារែកមិនរំសាយអាវុធរបស់ពួកហាម៉ាស៕