ប្រធានាធិបតីអាមេរិកលោក Donald Trump កាលពីថ្ងៃសៅរ៍ (ទី១ ខែវិច្ឆិកា) បាននិយាយថា លោកបានស្នើឲ្យក្រសួងការពារជាតិរៀបចំត្រៀម សម្រាប់លទ្ធភាពមានវិធានការយោធា «យ៉ាងលឿនរហ័ស» នៅក្នុងប្រទេសនីហ្សេរីយ៉ា ប្រសិនបើប្រទេសអាហ្វ្រិកខាងលិចមួយនេះមិនអាចបង្រ្កាបការសម្លាប់លើគ្រិស្តសាសនិកនោះទេ។

ហើយជាមួយគ្នានេះ តាមរយៈការបង្ហោះលើបណ្ដាញសង្គម Truth Social លោក Trump បានលើកឡើងថា រដ្ឋាភិបាលសហរដ្ឋអាមេរិក ក៏នឹងបញ្ឈប់ជាបន្ទាន់នូវជំនួយ និងការជួយទាំងអស់ដល់នីហ្សេរីយ៉ា ជាប្រទេសដែលមានប្រជាជនច្រើនបំផុត នៅទ្វីបអាហ្រ្វិក និងជាប្រទេសផលិតប្រេងធំជាងគេ។

ប្រសិនបើសហរដ្ឋអាមេរិកបញ្ជូនកងកម្លាំងយោធាទៅ កងទ័ពនឹងប្រើប្រាស់ «អាវុធយ៉ាងខ្លាំងក្លា» ដើម្បីលុបបំបាត់ទាំងស្រុងនូវពួកភេរវករ ដែលលោកបាននិយាយថា «កំពុងប្រព្រឹត្តអំពើឃោរឃៅដ៏អាក្រក់ទាំងនេះ» តែលោកមិនបានផ្តល់ភស្តុតាងជាក់លាក់ណាមួយឡើយ អំពីការប្រព្រឹត្តិ លើអ្នកកាន់សាសនាគ្រិស្ត នៅនីហ្សេរីយ៉ា។

លោក Trump បានហៅនីហ្សេរីយ៉ាថា ជា «ប្រទេសដ៏គួរឲ្យអាម៉ាស់» ហើយបានព្រមានរដ្ឋាភិបាលរបស់ប្រទេសនេះត្រូវតែកែប្រែឲ្យបានឆាប់។ លោកបានសេរសេរទៀតថា៖ «ប្រសិនបើយើងវាយប្រហារ វានឹងមានភាពលឿនរហ័ស ឥតប្រណី និងទន់ភ្លន់ មិនខុសពីអ្វីដែលពួកចោរភេរវករវាយប្រហារគ្រិស្ដសាសនិកជាទីគោរពស្រឡាញ់របស់យើងនោះទេ!»។

ទីក្រុង Abuja មិនមានប្រតិកម្មអ្វីភ្លាមៗនោះឡើយ ចំពោះការគំរាមកំហែងរបស់ Trump ដែលចង់មានវិធានការយោធានេះ។ ហើយសេតវិមានក៏មិនមានការអត្ថាធិប្បាយភ្លាមៗនោះដែរ ពាក់ព័ន្ធនឹងពេលវេលាដែលអាចមានវិធានការយោធារបស់អាមេរិកណាមួយ។

គួរដឹងថា ប្រទេសនីហ្សេរីយ៉ា ដែលមានក្រុមជនជាតិភាគតិចចំនួន ២០០ គោរពសាសនាផ្សេងៗ ដូចជាគ្រិស្ត ឥស្លាម និងសាសនាតាមបែបប្រពៃណី មានប្រវត្តិនៃការរួមរស់ដោយសន្តិភាពយូរអង្វែងណាស់មកហើយ ប៉ុន្តែក៏បានឃើញមានផ្ទុះឡើងនូវអំពើហិង្សា ក្នុងចំណោមក្រុមទាំងនោះផងដែរ ដែលជារឿយៗកាន់តែធ្ងន់ធ្ងរឡើងៗ ដោយសារជម្លោះជាតិសាសន៍ ឬការដណ្ដើមប្រភពធនធានដែលខ្វះខាត៕