ស៊ីហ្គេម៖ កម្ពុជាបានប្ដេជ្ញារៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេមឆ្នាំ២០២៣ គឺជាព្រឹត្តិការណ៍សន្សំសំចៃ និងចំណាយតិចជាងព្រឹត្តិការណ៍មុនៗក្រោមគោលការណ៍យុទ្ធសាស្ដ្រ «សន្សំសំចៃ តែផ្ដល់នូវភាពអស្ចារ្យដល់ព្រឹត្តិការណ៍ប្រកួត ឬ Saving Games but Delivering the Best Games»។
នេះគឺជាបទអន្តរាគមន៍ពិសេសរបស់ឯកឧត្តមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) ក្នុងសន្និបាតបូកសរុបលទ្ធផលការងារឆ្នាំ២០២១ និងលើកទិសដៅឆ្នាំ២០២២-២០២៣ និងសិក្ខាសាលាថ្នាក់ជាតិស្ដីពីអភិបាលកិច្ចល្អដែលរៀបចំរយៈពេល ២ថ្ងៃនៅសណ្ឋាគារសុខាកាលពីថ្ងៃទី០៩-១០ ខែកុម្ភៈ ក្រោមអធិបតីភាពសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធាន CAMSOC។ ជាមួយការកំណត់យុទ្ធសាស្ដ្រសន្សំសំចៃ ឬ Saving Games នេះ ត្រូវបានឯកឧត្តម វ៉ាត់ ចំរើន អគ្គលេខាធិការCAMSOC ពន្យល់ថា គឺជាការចំណាយតិច តែធ្វើឲ្យអស្ចារ្យ។ ការចំណាយតិចមានន័យថា ធ្វើឲ្យមានភាពត្រឹមត្រូវ កុំបំប៉ោងតួរលេខ កុំខ្ជះខ្ជាយ ត្រូវមានការទទួលខុសត្រូវ ហើយគិតគូរដល់ភាពសន្សំសំចៃជានិច្ច ពិសេសការចូលរួមរបស់កម្លាំងស្ម័គ្រចិត្តដែលមានស្មារតីស្ម័គ្រចិត្ត និងមានសុឆន្ទៈរួមដើម្បីកាត់បន្ថយការចំណាយ ហើយឆ្ពោះទៅរកភាពជោគជ័យក្នុងព្រឹត្តិការណ៍ជាប្រវត្តិសាស្ដ្រលើកដំបូងនៅកម្ពុជានេះ។
ឯកឧត្តមបណ្ឌិត ថោង ខុន បានគូសបញ្ជាក់ថា ការកំណត់យុទ្ធសាស្ដ្រសន្សំសំចៃ តែផ្ដល់ភាពអស្ចារ្យក្នុងដំណើរការរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេមឆ្នាំ២០២៣ ដោយសារស្ថានភាពសេដ្ឋកិច្ចពិភពលោកកំពុងស្ថិតក្នុងភាពមិនហ្នឹងន៎ និងមានឱនភាពយ៉ាងខ្លាំងដោយសារជំងឺរាតត្បាតជាសកលកូវីដ-១៩ ហើយឥទ្ធិពលនៃវិបត្តិសេដ្ឋកិច្ចសកលនេះ ក៏បានប៉ះពាល់មកលើសេដ្ឋកិច្ចប្រទេសកម្ពុជាផងដែរ។ ឯកឧត្តមរំពឹងថា គ្រប់ភាគីពាក់ព័ន្ធនឹងចូលរួមសហការ ដើម្បីកាត់បន្ថយខ្ទង់ចំណាយរាប់សិបលានដុល្លារក្នុងព្រឹត្តិការណ៍ប្រវត្តិសាស្ដ្រលើកដំបូងនៅកម្ពុជានេះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
