ភ្នំពេញ ៖ ក្នុងថ្ងៃទី៣ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅរាជធានីភ្នំពេញ ត្រូវនឹងថ្ងៃទី៦ ខែវិចិ្ឆកា ឆ្នាំ២០២៥នេះ បងប្អូនប្រជាពលរដ្ឋ នៅរាជធានីភ្នំពេញ និងមកពីបណ្តាខេត្តជាច្រើន បានអញ្ជើញមកលេងកម្សាន្តនៅរមណីយដ្ឋានប្រវតិ្តសាស្រ្តវត្តភ្នំ។

បងប្អូនប្រជាពលរដ្ឋរស់នៅរាជធានីភ្នំពេញ និងមកពីខេត្តស្វាយរៀង ព្រៃវែង បាត់ដំបង និងខេត្តកំពត មកលំហែនៅរមណីយដ្ឋានប្រវតិ្តសាស្រ្តវត្តភ្នំ បានលើកឡើងរួមគ្នាថា ថ្ងៃនេះពួកគាត់បានមកកម្សាន្តក្នុងរាជធានីភ្នំពេញ ចំថ្ងៃទី៣ នៃព្រះរាជពិធីបុណ្យអុំទូក បន្ទាប់ពីពួកគាត់ខ្លះ បានទៅកម្សាន្តនៅខេត្តកំពង់ធំ សៀមរាប និងខេត្តបាត់ដំបង កាលពីពិធីបុណ្យអុំទូកថ្ងៃទី១ និងថ្ងៃទី២។ ដោយឡែកការរៀបចំ និងដំណើរកម្សាន្តក្នុងរាជធានីភ្នំពេញ គឺសប្បាយ និងរំភើប ឃើញការរៀបចំបានល្អមែនទែន ថ្វីត្បិតតែក្នុងរាជធានីភ្នំពេញ ផ្អាកមិនមានការរៀបចំកម្មវិធីបុណ្យអុំទូកពិតមែន ក៏ប៉ុន្តែការរៀបចំសម្រាប់ទទួលបងប្អូនប្រជាពលរដ្ឋ ឲ្យដើរលេងកម្សាន្តសប្បាយទូទៅដូចតាមបណ្តាខេត្តផ្សេងៗផងដែរ។

សូមបញ្ជាក់ថា នៅក្នុងរមណីយដ្ឋានប្រវតិ្តសាស្រ្តវត្តភ្នំ បានរៀបចំពិព័រណ៍សាធារណៈមិនអចិន្ត្រៃយ៍អំពី «រូបថតវត្ថុសិល្បៈខ្មែរទាមទារបញ្ជូនត្រឡប់មកកម្ពុជាវិញ» ពិព័រណ៍នេះរៀបចំឡើងក្នុងគោលបំណងផ្សព្វផ្សាយ អំពីព័ត៌មានវត្ថុសិល្បៈខ្មែរដែលត្រូវបានគេលួចចរាចរដោយខុសច្បាប់ចេញពីកម្ពុជា កំឡុងពេល សង្គ្រាមស៊ីវិល (១៩៧០-១៩៩០) ទៅបរទេស ដែលរាជរដ្ឋាភិបាល បានខិតខំ ប្រឹងប្រែងក្នុងការទាមទារបញ្ជូនត្រឡប់មកមាតុប្រទេសវិញ។ ព្រមទាំងដាក់តាំង បង្ហាញរូបថតវត្ថុបុរាណដែលបានចុះបញ្ជីជាវត្ថុបាត់មួយចំនួនទៀត ដែលក្រុមការងារក្រសួងវប្បធម៌ និងវិចិត្រសិល្បៈកំពុងស្វែងរកបន្តដើម្បីបញ្ជូនត្រឡប់មកមាតុប្រទេសវិញ៕

អត្ថបទ រដ្ឋា