ការិយាល័យរបស់លោកនាយករដ្ឋមន្ត្រី Pedro Sanchez នៅថ្ងៃសុក្រ (ទី៧ ខែវិច្ឆិកា) បានឲ្យដឹងថា ប្រធានាធិបតីអ៊ុយក្រែន លោក Volodymyr Zelenskyy នឹងធ្វើទស្សនកិច្ចនៅប្រទេសអេស្ប៉ាញ ក្នុងប៉ុន្មានថ្ងៃខាងមុខនេះ ដោយមិនបង្ហាញពីកាលបរិច្ឆេទពិតប្រាកដ ឬការធ្វើដំណើរនោះឡើយ ដោយសារហេតុផលសុវត្ថិភាព។

គួរដឹងថា លោក Zelenskyy ធ្លាប់បានគ្រោងទៅកាន់អេស្ប៉ាញ កាលពីខែមេសា ប៉ុន្តែការធ្វើដំណើរត្រូវបានលុបចោលវិញ នៅពេលដែលសម្តេចសង្ឃកាតូលិក ប៉ាប ហ្វ្រង់ស៊ីស បានសោយទិវង្គត។

កាលពីខែមុន លោក Sanchez បានប្រាប់លោក Zelenskyy ថា អេស្ប៉ាញនឹងគាំទ្រអ៊ុយក្រែន រហូតដល់ «សន្តិភាពដ៏យុត្តិធម៌ និងយូរអង្វែង» សម្រេចបាន នៅក្នុងសង្រ្គាមរបស់ប្រទេសនេះ ជាមួយរុស្ស៊ី ដែលឥឡូវនេះ ស្ថិតនៅក្នុងឆ្នាំទី៤ ហើយ។

យោងតាមសារព័ត៌មាន El Pais បានឲ្យដឹងថា ក្នុងដំណើរទស្សនកិច្ចនោះ លោក Zelenskyy នឹងទៅទស្សនាសារមន្ទីរ Reina Sofia របស់ទីក្រុង Madrid ដែលជាទីកន្លែងតាំងផ្ទាំងគំនូរ «Guernica» ឆ្នាំ១៩៣៧ របស់វិចិត្រករ លោក (Pablo) Picasso ជារូបភាពដែលពណ៌នា អំពីភាពរន្ធត់នៃសង្រ្គាម។

សូមបញ្ជាក់បន្ថែមថា ប្រទេសអេស្ប៉ាញ បានចុះហត្ថលេខាលើកិច្ចព្រមព្រៀងសន្តិសុខ និងការពារជាតិទ្វេភាគីរយៈពេល ១០ឆ្នាំជាមួយអ៊ុយក្រែន កាលពីខែឧសភា ឆ្នាំ២០២៤ ក្នុងអំឡុងពេលមានដំណើរទស្សនកិច្ចចុងក្រោយរបស់លោក Zelenskyy៕