យោងតាមក្រុមមន្ត្រីរដ្ឋ Parana ព្យុះកំបុតត្បូងដ៏ខ្លាំងក្លាមួយបានបោកបក់ពាសពេញភាគខាងត្បូងប្រទេសប្រេស៊ីលកាលពីថ្ងៃសៅរ៍ ៨វិច្ឆិកា ដោយបានសម្លាប់មនុស្ស៦នាក់ របួសយ៉ាងហោចណាស់ ៧៥០ នាក់ និងបានបំផ្លាញសង្កាត់ទាំងមូលនៅក្នុងទីក្រុង Rio Bonito do Iguacu ។ វីដេអូបង្ហាញពីរថយន្តជាច្រើនបានគរលើគ្នា ដំបូលផ្ទះបានហែកចេញពីគ្នា និងអ្នកស្រុកកំពុងរើយករបស់របរចេញពីគំនរបាក់បែក។

ជាងជួសជុលរថយន្តលោក Gilberto Brecailo ដែលរោងជាងរបស់លោក ត្រូវបានបំផ្លាញ បាននិយាយថា អ្វីដែលពួកលោកនៅសល់គឺសម្លៀកបំពាក់ និងឯកសារតែប៉ុណ្ណោះ។ នាយកមន្ទីរពេទ្យលោកស្រី Cinthia Kely Somariva បាននិយាយថា យប់ថ្ងៃសុក្រគឺពេលវេលាសោកសៅ ដោយអ្នកជំងឺនៅតែស្ថិតក្នុងបន្ទប់សង្គ្រោះបន្ទាន់ ។

រដ្ឋាភិបាលរដ្ឋបានប្រកាសកាន់ទុក្ខជាផ្លូវការរយៈពេលបីថ្ងៃ និងស្ថានភាពគ្រោះមហន្តរាយសាធារណៈ ដោយអនុញ្ញាតឱ្យមានមូលនិធិសង្គ្រោះបន្ទាន់ និងការគាំទ្រពីសហព័ន្ធ។ មនុស្សប្រហែល ១ពាន់នាក់ ត្រូវបានផ្លាស់ទីលំនៅ ដោយមានជម្រកបណ្តោះអាសន្នត្រូវបានបង្កើតឡើងនៅជិតទីក្រុង Laranjeiras do Sul ។

ក្រុមអាជ្ញាធរបាននិយាយថា កម្លាំងខ្យល់បានឡើងដល់ ២៥០គីឡូម៉ែត្រក្នុងមួយម៉ោង ដោយបានបំផ្លាញផ្ទះសម្បែង និងអគារសាធារណៈចំនួន ៩០% នៃទីក្រុង Rio Bonito do Iguacu។ ក្រុមជួយសង្គ្រោះ រួមទាំងក្រុមពន្លត់អគ្គិភ័យ និងក្រុមការពារជនស៊ីវិល បានធ្វើការពេញមួយយប់ ដើម្បីសម្អាតកម្ទេចកម្ទី និងស្តារសេវាកម្មសំខាន់ៗឡើងវិញ៕