ក្រុមអាជ្ញាធរនូវែលសេឡង់ បាននិយាយនៅថ្ងៃអាទិត្យ ៩ វិច្ឆិកា ថា យន្តហោះបន្ថែមកំពុងត្រូវបានបញ្ជូនទៅប្រយុទ្ធប្រឆាំងនឹងភ្លើងឆេះព្រៃគ្រប់គ្រងលែងបាន ដែលបានឆេះរាលដាលពាសពេញឧទ្យានជាតិប្រហែល ១.១០០ ហិកតា នៅកោះ North Island ភាគកណ្តាលរបស់ប្រទេសនេះ។

ក្រុមពន្លត់អគ្គិភ័យបានចាប់ផ្តើមតតាំងនឹងចំហេះព្រៃនៅឧទ្យានជាតិ Tongariro ដែលជាតំបន់ឡើងភ្នំដ៏ពេញនិយមមួយ កាលពីរសៀលថ្ងៃសៅរ៍ ៨ វិច្ឆិកា ហើយអ្នកឡើងភ្នំប្រហែល ៤០ នាក់ត្រូវបានដឹកជញ្ជូនតាមយន្តហោះទៅកាន់កន្លែងសុវត្ថិភាព។ ទោះជាយ៉ាងណាក៏ដោយ កិច្ចខិតខំប្រឹងប្រែងពន្លត់អណ្ដាតភ្លើង ត្រូវបានផ្អាកពេញមួយយប់ដោយសារហេតុផលសុវត្ថិភាព។

អង្គភាពពន្លត់អគ្គិភ័យ និងសង្គ្រោះបន្ទាន់របស់ប្រទេសនូវែលសេឡង់ បាននិយាយនៅថ្ងៃអាទិត្យថា យន្តហោះពន្លត់អគ្គិភ័យបន្ថែមទៀតកំពុងត្រូវបានបញ្ជូនទៅតំបន់នោះ ដែលធ្វើឱ្យចំនួនឧទ្ធម្ភាគចក្រ កើនឡើងដល់១៥ គ្រឿង និងយន្តហោះ៥ គ្រឿង។

អង្គភាពពន្លត់អគ្គិភ័យ និងសង្គ្រោះបន្ទាន់នូវែលសេឡង់ បាននិយាយថា យន្តហោះត្រួតពិនិត្យមួយគ្រឿងនៅថ្ងៃអាទិត្យនេះ នឹងបញ្ជាក់ពីវិសាលភាពនៃភ្លើងឆេះព្រៃ។ អាស្រ័យលើអ្វីដែលបានបង្ហាញ គេរំពឹងថានឹងចំណាយពេលពេញមួយថ្ងៃនៃប្រតិបត្តិការដើម្បីគ្រប់គ្រងភ្លើងឆេះព្រៃ៕