មនុស្សជិតមួយលាននាក់ បានជម្លៀសចេញពីលំនៅឋានក្នុងប្រទេសហ្វីលីពីននៅថ្ងៃនេះ ខណៈប្រទេសនេះរងការគំរាមកំហែងពីព្យុះថ្មីមួយទៀត គឺព្យុះទីហ្វុងដ៏មានឥទ្ធិពល Fung-wong ប៉ុន្មានថ្ងៃបន្ទាប់ពីប្រទសនេះរងការវាយប្រហារពីព្យុះទីហ្វុង Kalmaegi ដែលបានផ្ដាច់ជីវិតមនុស្ស ២២៤នាក់ និងសម្លាប់មនុស្ស៥នាក់នៅវៀតណាម។

សញ្ញាព្រមានពីព្យុះ ត្រូវបានដំឡើងនៅទូទាំងតំបន់ធំៗរបស់ប្រទេសហ្វីលីពីន ដោយសញ្ញាទី ៥ ដែលជាការព្រមានកម្រិតខ្ពស់បំផុត បានប្រកាសនៅភាគអាគ្នេយ៍នៃកោះ Luzon រួមទាំងកោះ Catanduanes និងតំបន់ឆ្នេរសមុទ្រ Camarines Norte និង Camarines Sur ខណៈទីក្រុងរណបម៉ានីល និងតំបន់ជុំវិញស្ថិតនៅក្រោមសញ្ញាទី ៣។

ព្យុះទីហ្វុង Fung-wong ដែលមានល្បឿនខ្យល់បក់ខ្លាំងរហូតដល់ ១៨៥ គីឡូម៉ែត្រក្នុងមួយម៉ោង ត្រូវបានគេស្គាល់ក្នុងស្រុកឈ្មោះថា Uwan ត្រូវបានគេព្យាករណ៍ថានឹងបោកបក់ចូលខេត្ត Aurora ក្នុងភាគកណ្តាលកោះ Luzon នៅយប់ថ្ងៃអាទិត្យនេះ។

ផ្នែកនានានៃតំបន់ Eastern Visayas ត្រូវបានជួបប្រទះការដាច់ចរន្តអគ្គិសនីរួចទៅហើយ ។

យោងតាមនិយតករអាកាសចរណ៍ស៊ីវិល ជើងហោះហើរក្នុងស្រុក និងអន្តរជាតិជាង ៣០០ ត្រូវបានលុបចោល៕