យោងតាមទីភ្នាក់ងារសារព័ត៌មានជាតិលីបង់ (NNA) បងប្អូនប្រុសពីរនាក់ត្រូវបានសម្លាប់ក្នុងការវាយប្រហារតាមអាកាសរបស់អ៊ីស្រាអែលលើយានយន្តមួយគ្រឿងរវាងទីក្រុង Ain Ata និង Shebaa ភាគអាគ្នេយ៍នៃប្រទេសលីបង់ ជាការរំលោភបំពានយ៉ាងធ្ងន់ធ្ងរចុងក្រោយបំផុតនៃបទឈប់បាញ់មានអាយុកាលមួយឆ្នាំ។

សហភាពអឺរ៉ុបបានថ្កោលទោសការវាយប្រហារថ្មីៗរបស់អ៊ីស្រាអែលក្នុងសេចក្ដីថ្លែងការណ៍ដ៏ម៉ឺងម៉ាត់មួយកាលពីថ្ងៃសៅរ៍និងជំរុញឱ្យគោរពបទឈប់បាញ់។

ក្រសួងសុខាភិបាលលីបង់និយាយថា ក្នុងការវាយប្រហារដាច់ដោយឡែកមួយកាលពីថ្ងៃសៅរ៍ យានដ្រូនរបស់អ៊ីស្រាអែលមួយគ្រឿងបានវាយប្រហាររថយន្តមួយគ្រឿងនៅជិតមន្ទីរពេទ្យ Salah Ghandour ក្នុងទីក្រុង Bint Jbeil ភាគខាងត្បូង ដោយបានធ្វើឱ្យមនុស្ស ៧ នាក់រងរបួស។ មីស៊ីលពីរគ្រាប់បានវាយប្រហារយានយន្ត នៅក្នុងតំបន់ដែលមានប្រជាជនរស់នៅច្រើន។

សារព័ត៌មាន NNA បានរាយការណ៍ថា ការវាយប្រហារដោយយានដ្រូនរបស់អ៊ីស្រាអែលមួយផ្សេងទៀត ដែលជាការវាយប្រហារលើកទីបីក្នុងថ្ងៃដដែលនោះ បានប៉ះចំរថយន្តមួយគ្រឿងក្នុងតំបន់ Baraachit។ រូបថតមួយសន្លឹកដែលបានចែករំលែកដោយទីភ្នាក់ងារនេះបានបង្ហាញផ្សែងហុយឡើង នៅលើផ្លូវមួយបន្ទាប់ពីការវាយប្រហារ ដែលក្រសួងនិយាយថាបានសម្លាប់មនុស្សម្នាក់ និងមនុស្ស៤នាក់ផ្សេងទៀត រងរបួស ។

យោធាអ៊ីស្រាអែលបានអះអាង ដោយមិនបានផ្តល់ភស្តុតាងថា ការវាយប្រហារទាំងនោះមានគោលដៅលើក្រុម (Hezbollah )។

បើទោះបីជាមានបទឈប់បាញ់នៅខែវិច្ឆិកា ឆ្នាំ២០២៤ ក៏ដោយ ក៏អ៊ីស្រាអែលបានបន្តវាយប្រហារស្ទើរតែរាល់ថ្ងៃលើប្រទេសជិតខាងភាគខាងជើងរបស់ខ្លួន ខណៈបន្តរក្សាកងកម្លាំងក្នុងតំបន់ជុំវិញនានានៅភាគខាងត្បូង៕