សាក្សីបាននិយាយថា អ្នកតាំងលំនៅឋានអ៊ីស្រាអែល បានវាយក្រុមអ្នកភូមិប៉ាឡេស្ទីន សកម្មជន និងអ្នកសារព័ត៌មាន ដែលបានមកប្រមូលផ្តុំគ្នាក្នុងអំឡុងពេលប្រមូលផលផ្លែអូលីវនៅជិតប៉ុស្តិ៍ជួរមុខទីតាំងលំនៅឋានក្នុងតំបន់ West Bank កាន់កាប់ដោយអ៊ីស្រាអែល។

បុគ្គលិកសារព័ត៌មានReuters ពីរនាក់ អ្នកសារព័ត៌មានម្នាក់និងទីប្រឹក្សាសន្តិសុខដែលអមដំណើរ ស្ថិតក្នុងចំណោមអ្នករងរបួសក្នុងការវាយប្រហារដោយអ្នកដែលមានកាន់ដំបង និងគប់ដុំថ្មធំៗ នៅក្នុងតំបន់ជិតភូមិ Beita របស់ប៉ាឡេស្ទីន។

តំបន់ ដែលស្ថិតនៅភាគខាងត្បូងទីក្រុង Nablus តំបន់West Bank កាលពីប៉ុន្មានឆ្នាំមុនគឺជាចំណុចក្តៅមួយសម្រាប់ការវាយប្រហាររបស់អ្នកតាំងលំនៅឋាន ដែលបានកើនឡើងនៅទូទាំងតំបន់West Bank បន្ទាប់ពីសង្គ្រាមនៅហ្កាហ្សាដែលបានចាប់ផ្តើមរយៈពេលពីរឆ្នាំកន្លងទៅនេះ។ ការវាយប្រហារបែបនេះបានកើនឡើងក្នុងអំឡុងពេលប្រមូលផលផ្លែអូលីវនៅឆ្នាំនេះ ដែលបានចាប់ផ្តើមក្នុងខែតុលា។

សកម្មជន ឬប្រជាជនប៉ាឡេស្ទីនក្នុងស្រុក តែងតែផ្តល់ដំណឹងដល់អ្នកសារព័ត៌មានអំពីផែនការប្រមូលផល ដូច្នេះពួកគេអាចចូលរួមរាយការណ៍ ជាពិសេសនៅតំបន់ក្តៅ ដូចជានៅប៉ុស្តិ៍ជួរមុខជាដើម។

ប៉ាឡេស្ទីន និងប្រទេសភាគច្រើន បានចាត់ទុកការតាំងលំនៅឋានណាមួយរបស់អ៊ីស្រាអែលថាខុសច្បាប់នៅក្រោមច្បាប់អន្តរជាតិ។ ប៉ុន្តែអ៊ីស្រាអែល បានច្រានចោលរឿងនេះ។