ប្រធានយោធាចក្រភពអង់គ្លេសបាននិយាយកាលពីថ្ងៃអាទិត្យថា ចក្រភពអង់គ្លេសកំពុងបញ្ជូនឧបករណ៍ និងក្រុមបុគ្គលិកជំនាញទៅកាន់ប្រទេសបែលហ្ស៊ិក បន្ទាប់ពីប្រទះឃើញយានដ្រូន នៅជិតអាកាសយានដ្ឋានមួយចំនួន។

កាលពីសប្តាហ៍មុន អាកាសយានដ្ឋានអន្តរជាតិសំខាន់របស់ប្រទេសបែលហ្ស៊ិកនៅទីក្រុងព្រុចសែល និងទីក្រុងលីជ (Liege) ដែលជាអាកាសយានដ្ឋានដឹកទំនិញធំជាងគេមួយក្នុងចំណោមអាកាសយានដ្ឋានដឹកទំនិញធំជាងជាច្រើនរបស់អឺរ៉ុប ត្រូវបានបង្ខំឱ្យបិទជាបណ្តោះអាសន្ន ដោយសារតែការឈ្លានពានរបស់យានដ្រូន។ ហេតុការណ៍នេះបានកើតឡើងបន្ទាប់ពីការហោះហើររបស់យានដ្រូន មិនស្គាល់អត្តសញ្ញាណជាបន្តបន្ទាប់នៅជិតមូលដ្ឋានយោធាមួយកន្លែង ជាទីដែលអាវុធនុយក្លេអ៊ែររបស់សហរដ្ឋអាមេរិកត្រូវបានរក្សាទុក។

លោក Richard Knighton មេបញ្ជាការកងទ័ពអាកាស ដែលជាប្រធានកងកម្លាំងប្រដាប់អាវុធរបស់ចក្រភពអង់គ្លេស បាននិយាយថា ចក្រភពអង់គ្លេសបានយល់ព្រម ដាក់ពង្រាយកម្លាំង និងឧបករណ៍របស់ខ្លួនទៅកាន់ប្រទេសបែលហ្ស៊ិកដើម្បីជួយពួកគេ បន្ទាប់ពីមានការស្នើសុំពីអាជ្ញាធរបែលហ្ស៊ិក។

ក្នុងរយៈពេលប៉ុន្មានខែថ្មីៗនេះ ឧប្បត្តិហេតុយានដ្រូននៅទូទាំងទ្វីបអឺរ៉ុបបានបង្ខំឱ្យអាកាសយានដ្ឋានមួយចំនួនផ្អាកជើងហោះហើរក្នុងពេលតែមួយ។ រុស្ស៊ីត្រូវបានស្តីបន្ទោសក្នុងករណីខ្លះ ប៉ុន្តែបែលហ្ស៊ិកមិនបាននិយាយថាអ្នកណាជាអ្នកនៅពីក្រោយប្រតិបត្តិការយានដ្រូននោះទេ។ រដ្ឋមន្ត្រីក្រសួងការពារជាតិបែលហ្ស៊ិក លោក Theo Francken បាននិយាយថា លោកជឿថាឧប្បត្តិហេតុមួយចំនួនគឺជាផ្នែកមួយនៃ ប្រតិបត្តិស្រាវជ្រាវក្នុងន័យសិក្សាពីអ្វីមួយប៉ុណ្ណោះ៕