ក្រសួងដឹកជញ្ជូនចិន បានប្រកាសនៅថ្ងៃចន្ទ (១០ វិច្ឆិកា) នេះថា ប្រទេសចិន ផ្អាកថ្លៃសេវាកំពង់ផែដែលបង់ដោយនាវាមានទំនាក់ទំនងជាមួយសហរដ្ឋអាមេរិក សម្រាប់រយៈពេល ១ឆ្នាំ ហើយការផ្អាកនេះចាប់ផ្តើមពីម៉ោងក្នុងស្រុក ០១:០១នាទីរសៀល ថ្ងៃចន្ទតទៅ។

ការប្រកាសនេះគឺដើម្បីអនុវត្តការឯកភាពគ្នារវាងចិន-អាមេរិក ក្នុងកិច្ចពិភាក្សាសេដ្ឋកិច្ច និងពាណិជ្ជកម្មនៅទីក្រុងគូឡាឡាំពួរ ដែលនេះជាសកម្មភាពស្របគ្នាបន្ទាប់ពីសហរដ្ឋអាមេរិក ក៏បានផ្អាកវិធានការរបស់ខ្លួនក្រោមការស៊ើបអង្កេតជំពូកទី៣០១ ប្រឆាំងនឹងវិស័យដែនសមុទ្រ ភស្តុភារ និងការសាងសង់នាវារបស់ចិន នេះបើតាមគេហទំព័ររបស់ក្រសួង។

រដ្ឋបាលអាមេរិក បាននិយាយនៅថ្ងៃព្រហស្បតិ៍ សប្ដាហ៍មុនថា ខ្លួននឹងបន្តកិច្ចចរចាជាមួយចិន ជុំវិញភាពលេចធ្លោរបស់ខ្លួននៃវិស័យកសាងនាវា និងការដឹកជញ្ជូនតាមមហាសមុទ្រ ខណៈទីក្រុងវ៉ាស៊ីនតោន បានផ្ដល់ភាពផ្លូវការសម្រាប់ការផ្អាករយៈពេល ១ឆ្នាំ នៃថ្លៃសេវាកំពង់ផែរបស់សហរដ្ឋអាមេរិក លើនាវាដែលមានទំនាក់ទំនងជាមួយប្រទេសចិន ជាផ្នែកមួយនៃកិច្ចព្រមព្រៀងទូលំទូលាយ ដើម្បីកាត់បន្ថយភាពតានតឹងពាណិជ្ជកម្ម៕