រដ្ឋាភិបាលនៃប្រទេសដាណឺម៉ាក បានយល់ព្រមអនុវត្តលក្ខខណ្ឌអាយុអប្បបរមា ១៥ឆ្នាំ សម្រាប់ការប្រើប្រាស់បណ្ដាញសង្គមមួយចំនួន។

ផែនការដែលដឹកនាំដោយក្រសួងឌីជីថលនីយកម្ម នឹងកំណត់អាយុ សម្រាប់ការចូលប្រើបណ្ដាញសង្គម ខណៈដែលអនុញ្ញាតឲ្យឪពុកម្តាយមួយចំនួន យល់ព្រមឲ្យកូនរបស់ពួកគេ ប្រើប្រាស់បណ្ដាញសង្គម ចាប់ពីអាយុ ១៣ឆ្នាំ។

សារព័ត៌មានបានរាយការណ៍ថា នីតិវិធីនេះ នឹងក្លាយជាវិធានការមួយ ក្នុងចំណោមវិធានការដ៏ទូលំទូលាយបំផុត ដែលរដ្ឋាភិបាលសហភាពអឺរ៉ុប បានធ្វើឡើង ដើម្បីដោះស្រាយការព្រួយបារម្ភ អំពីការប្រើប្រាស់បណ្ដាញសង្គម ក្នុងចំណោមមនុស្សវ័យជំទង់ និងកុមារតូចៗ។  

ក្រសួងឌីជីថលនីយកម្ម បានឲ្យដឹងក្នុងសេចក្តីថ្លែងការណ៍មួយថា៖ «ក្នុងនាមជាប្រទេសមួយ ក្នុងចំណោមប្រទេសដំបូង នៅសហភាពអឺរ៉ុប ដាណឺម៉ាកឥឡូវនេះ កំពុងបោះជំហានដំបូងឆ្ពោះទៅរកការកំណត់អាយុលើបណ្ដាញសង្គម។ វិធានការនេះ ត្រូវបានធ្វើឡើង ដើម្បីការពារកុមារ និងយុវជននៅក្នុងពិភពឌីជីថល»។

រដ្ឋមន្ត្រីកិច្ចការឌីជីថលនៃប្រទេសដាណឺម៉ាក លោកស្រី Caroline Stage Olsen បាននិយាយថា វេទិកាអនឡាញ បានរីករាលដាលក្នុងចំណោមកុមារ ដោយលោកស្រីបានកត់សម្គាល់ថា ៩៤ភាគរយនៃក្មេងអាយុក្រោម ១៣ឆ្នាំ និងជាងពាក់កណ្តាលនៃក្មេងដែលមានអាយុក្រោម ១០ឆ្នាំ មានគណនីបណ្ដាញសង្គមរួចហើយ៕