វិមានក្រឹមឡាំង នាថ្ងៃចន្ទ (ទី៩ ខែវិច្ឆិកា) បានឲ្យដឹងថា ខ្លួនចង់ឲ្យសង្រ្គាមអ៊ុយក្រែនឈនដល់ទីបញ្ចប់យ៉ាងឆាប់តាមដែលអាច ប៉ុន្តែថា កិច្ចប្រឹងប្រែង ដើម្បីដោះស្រាយជម្លោះ បានជាប់គាំង។

អ្នកនាំពាក្យវិមានក្រឹមឡាំង លោក Dmitry Peskov បានឆ្លើយតបទៅនឹងការកត់សម្គាល់ កាលពីថ្ងៃសុក្រចុងសប្ដាហ៍កន្លងមកពីសំណាក់ប្រធានាធិបតីអាមេរិក លោក Donald Trump ដែលបានលើកឡើងនៅក្នុងកិច្ចប្រជុំជាមួយនាយករដ្ឋមន្រ្តីហុងគ្រី លោក Viktor Orban ថា៖ «ខ្ញុំគិតថា យើងយល់ស្របគ្នាថា សង្រ្គាមនឹងបញ្ចប់ក្នុងពេលអនាគតដ៏ខ្លី»។

លោក Peskov ដែលផ្ដល់ព័ត៌មានទៅកាន់អ្នកសារព័ត៌មាន បានរំលឹកឡើងវិញនូវគោលជំហររបស់វិមានក្រឹមឡាំងថា សង្រ្គាមអាចបញ្ចប់នៅពេលដែលរុស្ស៊ីសម្រេចបាននូវគោលដៅរបស់ខ្លួន ហើយខ្លួនចង់ធ្វើបែបនេះ តាមមធ្យោបាយនយោបាយ និងការទូត។ ហើយដោយបានបន្ទោសលើអ៊ុយក្រែន លោកបានបញ្ជាក់ថា៖ «ប៉ុន្តែបច្ចុប្បន្នមានការផ្អាក។ ស្ថានភាពត្រូវបានជាប់គាំង។ ដំណើរការត្រូវបានជាប់គាំង មិនមែនដោយសារកំហុសរបស់យើងទេ»។

អ៊ុយក្រែន និងសម្ព័ន្ធមិត្តអឺរ៉ុបរបស់ខប្រទេសនេះ ច្រានចោលការចោទប្រកាន់របស់ទីក្រុងមូស្គូ ដែលថា ខ្លួនកំពុងរារាំងកិច្ចប្រឹងប្រែងសន្តិភាព។ គ្មានការចរចាទល់មុខគ្នា រវាងរុស្ស៊ី និងអ៊ុយក្រែន បានកើតឡើងឡើយ ចាប់តាំងពីថ្ងៃទី២៣ ខែកក្កដា។

លោក Trump បានព្យាយាមបញ្ចុះបញ្ចូលប្រធានាធិបតីរុស្ស៊ី លោក Vladimir Putin និងប្រធានាធិបតីអ៊ុយក្រែន លោក Volodymyr Zelenskiy ឲ្យជួបប្រជុំគ្នា ប៉ុន្តែវិមានក្រឹមឡាំង បានលើកឡើងថា ជំនួបកំពូលបែបនេះ អាចធ្វើឡើងតែនៅទីក្រុងមូស្គូប៉ុណ្ណោះ ជាលក្ខខណ្ឌដែលលោក Zelenskiy បដិសេធ។ លោកបាននិយាយម្តងហើយម្តងទៀតថា លោកមិនជឿថា លោក Putin មានភាពប្រាកដប្រជា ក្នុងការស្វែងរកសន្តិភាពនោះឡើយ។ តែលោក Peskov បានប្រាប់ថា គឺជាទីក្រុងគីវទៅវិញទេ ដែលមិនចង់បន្តកិច្ចសន្ទនា៕