​បាល់ទាត់៖ ​អ្នកគាំទ្រ​សញ្ជាតិ​ប្រេ​ស៊ី​ល​ម្នាក់ដែលជា​អ្នកគាំទ្រ​របស់​ក្លិប​ប្រេ​ស៊ី​ល Palmeiras ត្រូវបាន​គេ​បាញ់សម្លាប់​នៅ​ខាងក្រៅ​កីឡដ្ឋាន​ក្លិប​នៅ​ប្រេ​ស៊ី​ល បន្ទាប់ពី​បញ្ចប់​ការប្រកួត​វគ្គ​ផ្តាច់ព្រ័ត្រ FIFA Club World Cup ដែល Palmeiras ចាញ់ Chelsea នៅ​ទឹកដី​អារ៉ាប់​រួម​។ ​​នគរបាល​ទីក្រុង Sao Paulo លោក Cesar Saad បាន​ប្រាប់​អ្នកសារព័ត៌មាន​ថា ជនសង្ស័យ​ត្រូវបាន​ឃាត់ខ្លួន​រួចហើយ​។

​​លោក​បាន​បន្តថា អ្នកគាំទ្រ ១៥នាក់​ផ្សេងទៀត​បាន​រងរបួស​ក្នុងការ​ប៉ះទង្គិច​ជាមួយ​នគរបាល​បង្ក្រាប រឺក៏​ការប្រើប្រាស់​ហិង្សា​ក្នុងចំណោម​អ្នកគាំទ្រ​ដូចគ្នា​។​ ​​សូមបញ្ជាក់ថា អ្នកគាំទ្រ​ជាច្រើន​នាក់​របស់ Palmeiras ដែល​មិនបាន​ទៅ​ទឹកដី​អារ៉ាប់​រួម​ផ្ទាល់​បាន​ជួបជុំគ្នា​នៅ​ជុំវិញ​កីឡដ្ឋាន ​ដើម្បី​ទស្សនា​ការប្រកួត​។ ​​Chelsea បាន​យកឈ្នះ Palmeiras ២-១ នៅ​ម៉ោង​បន្ថែម​កាត់សេចក្តី​ដើម្បី​លើក​ពាន FIFA Club World Cup ជា​លើកដំបូង​ក្នុង​ប្រវត្តិសាស្ត្រ​ក្លិប​។ ​​Kai Havertz ដែលជា​អ្នក​ស៊ុត​គ្រាប់​ជ័យជំនះ​ឱ្យ Chelsea យកឈ្នះ Manchester City លើក​ពាន UEFA Champions League ​គឺជា​អ្នក​ស៊ុត​បាល់​ពិន័យ ១១ម៉ែត្រ​ឱ្យ Chelsea នៅ ៣​នាទីចុងក្រោយ​នៃ​ម៉ោង​បន្ថែម​៕

​​អត្ថបទ​៖​នាង សុភា​វុ​ធ