អ្នកនាំពាក្យក្រសួងពាណិជ្ជកម្ម កាលពីថ្ងៃចន្ទ (ទី១០ ខែវិច្ឆិកា) បានប្រាប់ឲ្យដឹងថា ប្រទេសចិនរំពឹងថា សហរដ្ឋអាមេរិកនឹងបន្តធ្វើការជាមួយប្រទេសចិន ក្នុងទិសដៅដូចគ្នា ដើម្បីរក្សាបរិយាកាសប្រកួតប្រជែងប្រកបដោយភាពយុត្តិធម៌ នៅក្នុងទីផ្សារដឹកជញ្ជូន និងសាងសង់នាវាអន្តរជាតិ។

នៅពេលត្រូវបានស្នើឲ្យធ្វើអត្ថាធិប្បាយលើការផ្អាករបស់សហរដ្ឋអាមេរិក សម្រាប់រយៈពេល ១ឆ្នាំនៃការអនុវត្តវិធានការស៊ើបអង្កេតកថាខណ្ឌទី៣០១ របស់ខ្លួន ដែលសំដៅលើវិស័យដែនសមុទ្រ ភស្តុភារ និងការសាងសង់នាវារបស់ប្រទេសចិន អ្នកនាំពាក្យរូបនេះបានលើកឡើងថា ការធ្វើបែបនេះនឹងជួយបន្ថែមភាពប្រាកដប្រជា និងស្ថិរភាពដល់កិច្ចសហប្រតិបត្តិការសេដ្ឋកិច្ច និងពាណិជ្ជកម្មចិន-អាមេរិក ក៏ដូចជាសេដ្ឋកិច្ចពិភពលោកផងដែរ។

នៅថ្ងៃដដែលនោះ ចិនបានផ្អាកវិធានការណ៍តបតរបស់ខ្លួន ដែលត្រូវបានដាក់កាលពីខែមុន សម្រាប់រយៈពេល ១ឆ្នាំ។ ហើយអ្នកពាក្យក្រសួងបានបញ្ជាក់ថា ទាំងនេះគឺជាជំហានសំខាន់ដែលភាគីទាំង២ បានអនុវត្ត ដើម្បីស្វែងរកចំណុចប្រសព្វ និងដើម្បីធ្វើការរួមគ្នា លើការអនុវត្តការព្រមព្រៀងគ្នាជាឯច្ឆន្ទនៃការចរចាសេដ្ឋកិច្ច និងពាណិជ្ជកម្មចិន-អាមេរិក នៅទីក្រុងគូឡាឡាំពួរ ប្រទេសម៉ាឡេស៊ី។

អ្នកនាំពាក្យរូបនេះបានកត់សម្គាល់ថា ប្រទេសចិនមានឆន្ទៈ ក្នុងការធ្វើទំនាក់ទំនង និងពិគ្រោះយោបល់ជាមួយសហរដ្ឋអាមេរិក លើបញ្ហាពាក់ព័ន្ធ ដោយឈរលើគោលការណ៍នៃការគោរពគ្នាទៅវិញទៅមក និងការពិគ្រោះដោយស្មើភាពគ្នា៕