នាថ្ងៃពុធ ទី១២ ខែវិច្ឆិកា ឆ្នាំ២០២៥ ឯកឧត្តម កឹម សុខុន រដ្ឋលេខាធិការក្រសួងពាណិជ្ជកម្ម និងមន្ត្រីជំនាញ បានអញ្ជើញជាគណៈអធិបតីដឹកនាំកិច្ចប្រជុំពិភាក្សា ស្តីពី ការពិនិត្យ និងផ្តល់ធាតុចូលលើលក្ខន្តិកៈសមាគម និងសៀវភៅបន្ទុកម៉ាកសម្គាល់ភូមិសាស្រ្តទំនិញ “ក្តាមថ្មកោះកុង”។

កិច្ចប្រជុំនេះ មានការចូលរួមពី ឯកឧត្តម ឃី វិបុលបុត្រា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោក ឈេង សុវណ្ណដា អភិបាលរងនៃគណៈអភិបាលខេត្តកោះកុង លោកប្រធានមន្ទីរពាណិជ្ជកម្មខេត្តកោះកុង លោក លោកស្រីប្រធានមន្ទីរខេត្តពាក់ព័ន្ធ តំណាងសាខា ក.ប.ប ខេត្តកោះកុង អ្នកជំនាញការរបស់អង្គការកម្មសិទ្ធិបញ្ញាពិភពលោក (WIPO) លោកមេស្រុក និងអាជ្ញាធរមូលដ្ឋានពាក់ព័ន្ធ ព្រមទាំងលោកប្រធានសហគមន៍តំបន់ការពារធម្មជាតិ ពាមក្រសោប និងសមាជិក ក្នុងខេត្តកោះកុង ជាច្រើនរូប។

ជាលទ្ធផល អង្គសិក្ខាសាលាបាន៖

- ទី១. ពិនិត្យ និងផ្តល់ធាតុចូលលើសេចក្តីព្រាងសៀវភៅបន្ទុកម៉ាកសម្គាល់ភូមិសាស្រ្តទំនិញ “ក្តាមថ្មកោះកុង” រួមមាន៖ ការកំណត់ ពូជ ប្រភេទក្តាមថ្ម វិធីសាស្រ្ត និងរដូវប្រមូលផល តំបន់នេសាទ និងចិញ្ចឹមក្តាមថ្មកោះកុង ព្រមទាំងលក្ខណៈពិសេសរបស់ក្តាមថ្មកោះកុង

- ទី២. បានពិនិត្យ និងផ្តល់ធាតុចូលលើលក្ខន្តិកៈសមាគម អំពីតួនាទី និងភារកិច្ចរបស់សមាគម និងការពិនិត្យលទ្ធភាពក្នុងការរួមបញ្ចូលគ្នារវាងសហគមន៍ក្នុងស្រុកចំនួន ៥ និងការរៀបចំបង្កើតទីស្នាក់ការដាច់ដោយឡែកមួយ ដើម្បីគ្រប់គ្រង និងត្រួតពិនិត្យគុណភាព និងអនុលោមភាពនៃសៀវភៅបន្ទុក និងលក្ខន្តិកៈរបស់ខ្លួន

- ទី៣. កំណត់កិច្ចប្រជុំបន្ត ដើម្បីពិនិត្យ និងសម្រេចលើសៀវភៅបន្ទុក និងលក្ខន្តិកៈសមាគម និងការបោះឆ្នោតជ្រើសរើសប្រធានសមាគម ដែលគ្រោងនឹងប្រព្រឹត្តទៅនាសប្តាហ៍ទី ៣ នៃខែធ្នូ ឆ្នាំ២០២៥ ខាងមុខនេះ៕