គុនចម្រុះ៖ អ្នកលេងគុនចម្រុះដ៏ល្បីឈ្មោះរបស់កម្ពុជា ចាន់ រតនា បានសម្រេចបង្ខំចិត្តបិទក្លិបសិល្បៈរបស់ខ្លួនជាបណ្ដោះអាសន្ន ដោយសារខ្វះខាតចំណូលដើម្បីទប់ទល់ការចំណាយលើផ្ទះជួល អំឡុងការរីករាលដាលខ្លាំងនៃជំងឺកូវីដ-១៩ បច្ចុប្បន្ន។
ចាន់ រតនា បានបញ្ជាក់ថា ដោយសារគោរពតាមការណែនាំរបស់អាជ្ញាធរ ដើម្បីបង្ការជំងឺកូវីដ-១៩ ទើបខ្លួនបង្ខំចិត្តបិទក្លិប ហើយការបិទក្លិបនេះបានធ្វើឲ្យលោកបាត់បង់ចំណូល ដែលទទួលបានពីការបង្ហាត់សិស្ស។ ដូច្នេះខ្លួនត្រូវស្វែងរកផ្ទះជួលតម្លៃសមរម្យរស់នៅមួយរយៈពេលសិន រហូតស្ថានភាពជំងឺដ៏កាចសាហាវនេះអំណោយផល ទើបខ្លួនរកកន្លែងថ្មីបើកក្លិបបន្ដ។ មកទល់ពេលនេះ ចាន់រតនា ពុំទាន់មានលំនៅឋានផ្ទាល់ខ្លួននោះទេ ដោយគេស្នាក់នៅផ្ទះជួលមួយកន្លែងជាមួយគ្រួសារ និងបើកក្លិបសិល្បៈស្ថិតនៅសង្កាត់បឹងទំពន់១ ខណ្ឌមានជ័យ ដោយជួលក្នុងមួយខែជាង ៦០០ដុល្លារ ។ ប៉ុន្ដែបច្ចុប្បន្នទីតាំងនេះ លោកបានប្រកាសបិទទ្វារហើយ ដោយនាំប្រពន្ធកូនទៅរកផ្ទះជួល តម្លៃសមរម្យរស់នៅមួយរយៈពេលសិន។
គួរដឹងថា ចាន់ រតនា គឺជាកីឡាករគុនចម្រុះដ៏ល្បីមួយរូបរបស់កម្ពុជា ដែលតែងបង្ហាញវត្តមានលើសង្វឿន ONE Championship ខណៈប្រកួតចុងក្រោយកាលពីចុងឆ្នាំ២០២០ កន្លងទៅ គេបានប្រកួតចាញ់កីឡាករចិន Xie Wei ក្នុងព្រឹត្តិការណ៍ ONE: COLLISION COURSE នៅប្រទេសសិង្ហបុរីនៅក្នុងទឹកដីទី៣។ រតនា ធ្លាប់ឡើងសង្វៀនលំដាប់ពិភពលោកនេះ ១១លើកខណៈឈ្នះ៣ និងចាញ់ ៨ដង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
