អ៊ុយក្រែន៖ សមាជិកអង្គភាពកងកម្លាំងពិសេសរបស់ប្រទេសអ៊ុយក្រែន បានធ្វើការហ្វឹកហ្វឺនយោធាដល់ប្រជាជនទីក្រុង Mariupol ដើម្បីបង្រៀនពួកគេឱ្យចេះការពារខ្លួនក្នុងករណីមានការវាយប្រហារពីប្រទេសរុស្ស៊ី។ កងវរសេនាតូចដែលជាផ្នែកមួយនៃឆ្មាំជាតិរបស់ប្រទេសអ៊ុយក្រែន បានបណ្តុះបណ្តាលប្រជាជនឱ្យរៀប និងដោះកាំភ្លើងដើម្បីដាក់គ្រាប់ និងតម្រង់គោលដៅ ខណៈរុស្ស៊ីដាក់ពង្រាយទាហានជាង ១០ម៉ឺននាក់នៅព្រំដែនជាមួយប្រទេសអ៊ុយក្រែន។
ប្រជាជនអាយុ ៧៩ឆ្នាំម្នាក់និយាយថា គាត់ចង់ត្រៀមខ្លួនដើម្បីការពារគ្រួសារក្នុងករណីមានការឈ្លានពានរបស់រុស្ស៊ី ហើយមិនចង់បាត់បង់ប្រទេសរបស់គាត់នោះទេ។ រុស្ស៊ីបដិសេធថា ខ្លួនគ្មានចេតនាឈ្លានពាននោះទេ ប៉ុន្តែបានដាក់ពង្រាយកងទ័ពជិត ១០ម៉ឺននាក់ជិតព្រំដែនអ៊ុយក្រែន និងបានបញ្ជូនទាហានទៅធ្វើសមយុទ្ធនៅប្រទេសបេឡារុសដែលនៅជិតខាង។ មន្ត្រីសហរដ្ឋអាមេរិកនិយាយថា ការបង្កើនឥទ្ធិពលរបស់រុស្ស៊ីបានឈានដល់ចំណុច ដែលអាចឈ្លានពានបានក្នុងរយៈពេលខ្លីខាងមុខ។ នៅក្នុងសញ្ញាមួយដែលមន្ត្រីអាមេរិកកំពុងត្រៀមខ្លួនសម្រាប់សេណារីយ៉ូករណីដ៏អាក្រក់បំផុត សហរដ្ឋអាមេរិកបានប្រកាសផែនការជម្លៀសបុគ្គលិករបស់ខ្លួន ភាគច្រើន ចេញពីស្ថានទូតក្នុងរដ្ឋធានីប្រទេសអ៊ុយក្រែន។
ជាមួយគ្នានេះដែរ ចក្រភពអង់គ្លេសបានចូលរួមជាមួយប្រទេសអឺរ៉ុបផ្សេងទៀត ក្នុងការជំរុញពលរដ្ឋរបស់ខ្លួនឱ្យចាកចេញពីអ៊ុយក្រែន។ សមាជិកម្នាក់និយាយថា វាជាការអំពាវនាវដ៏ត្រឹមត្រូវដើម្បីជម្លៀសអ្នកការទូត ព្រោះស្ថានភាពនឹងមានគ្រោះថ្នាក់សម្រាប់ពួកគេ។ ទោះយ៉ាងណាលោកនិយាយថា ប្រជាជនមិនគួរភ័យស្លន់ស្លោនោះទេ ព្រោះសម្ព័ន្ធមិត្តនឹងនៅតែជួយប្រទេសអ៊ុយក្រែន៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
