នាយករដ្ឋមន្រ្តីអ៊ុយក្រែន និយាយនៅថ្ងៃពុធនេះថា រដ្ឋាភិបាលអ៊ុយក្រែន បានព្យួរការងាររដ្ឋមន្រ្តីក្រសួងយុត្តិធម៌លោក German Galushchenko ស្របពេលការស៊ើបអង្កេតករណីអំពើពុករលួយក្នុងវិស័យថាមពល ។

ក្រុមអាជ្ញាធរអ៊ុយក្រែន បានចោទប្រកាន់បុគ្គល ៧នាក់ ទាក់ទងនឹងគម្រោងប្រាក់សគុណចោទប្រកាន់ ១០០លានដុល្លារ ពាក់ព័ន្ធក្រុមមន្រ្តីថាមពលជាន់ខ្ពស់ដែលបណ្តាលឲ្យមានការខឹងសម្បារយ៉ាងខ្លាំងដល់សាធារណជន ហើយនិងធ្វើឲ្យមានការផ្តោតអារម្មណ៍លើសង្រ្គាមប្រឆាំងអំពើពុករលួយរបស់អ៊ុយក្រែន ។

ក្រសួងរបស់លោកនិយាយកាលពីថ្ងៃអង្គារថា លោក Galushchenko ដែលកាលពីមុនបម្រើការជារដ្ឋមន្រ្តីថាមពល បានក្លាយជាកម្មវត្ថុនៃវិធានការស៊ើបអង្កេត ។

ពួកគេពុំបានបញ្ជាក់ឲ្យបានច្បាស់លាស់នោះទេថាតើ រឿងនេះទាក់ទងនឹងករណីពុករលួយថាមពលឬយ៉ាងណា ដែលត្រូវបានស៊ើបអង្កេតដោយមន្ទីរប្រឆាំងអំពើពុករលួយជាតិ ។

នៅក្នុងសារបង្ហោះលើបណ្តាញព័ត៌មានសង្គម Facebook លោក Galushchenko បានឯកភាពចំពោះការសម្រេចចិត្តរបស់រដ្ឋាភិបាល ដោយរូបលោកនិយាយថា ការព្យួរការងារនេះសម្រាប់រយៈពេលស៊ើបអង្កេត គឺជាសេនារីយ៉ូសមស្រប និងត្រឹមត្រូវ ។

លោក Galushchenko បន្តថា លោកនឹងការពារខ្លួនឯងនៅក្នុងវិស័យច្បាប់ និងបង្ហាញគោលជំហរស្អាតស្អំរបស់លោក ដោយរូបលោកពុំបានចែករំលែករឿងរ៉ាវលម្អិតពីមូលហេតុនៃការស៊ើបអង្កេតនេះឡើយ ។

ការចោទប្រកាន់ប្រាក់សគុណនៅក្នុងវិស័យថាមពល គឺជាបញ្ហាដ៏រសើបមួយជាមួយសាធារណជន ដែលពួកគេប្រឈមនឹងការដាច់ចរន្តអគ្គិសនីរយៈពេលយូររាល់ថ្ងៃនៅទូទាំងប្រទេស សូម្បីនៅមុនពេលរដូវរងាដ៏ត្រជាក់ ស្របពេលដែលពួកគេទប់ទល់នឹងការវាយប្រហារទ្រង់ទ្រាយធំរបស់រុស្ស៊ី លើហេដ្ឋារចនាសម្ព័ន្ធថាមពលរបស់ពួកគេ ៕