រដ្ឋមន្ត្រីសុខាភិបាលអង់គ្លេស លោក Wes Streeting នៅថ្ងៃពុធ (ទី១២ ខែវិច្ឆិកា) បានបដិសេធថា លោកមិនបាននិងកំពុងរៀបចំគម្រោងការ ដើម្បីទម្លាក់លោក Keir Starmer នោះឡើយ បន្ទាប់ពីសម្ព័ន្ធមិត្តរបស់នាយករដ្ឋមន្ត្រី បានប្រាប់បណ្ដាញសារព័ត៌មានថា ពួកគេបារម្ភថា ការប៉ុនប៉ងទម្លាក់មេដឹកនាំ អាចកើតឡើងនៅចុងខែនេះ បន្ទាប់ពីមានការប្រកាសកញ្ចប់ថវិកា។

លោក Starmer បានដឹកនាំគណបក្សការងាររបស់លោកឆ្ពោះទៅរកជ័យជម្នះនៃការបោះឆ្នោតដ៏ធំបំផុតមួយ ក្នុងប្រវត្តិសាស្ត្រអង់គ្លេស កាលពីឆ្នាំ២០២៤ ប៉ុន្តែត្រឹមតែ ១៦ខែក្រោយមក ក្រុមនេះបានធ្លាក់ចុះប្រជាប្រិយភាពនៅក្នុងការស្ទង់មតិ ហើយទំនងជាមិនអាចធ្វើតាមការសន្យាបោះឆ្នោតដ៏សំខាន់មួយរបស់ខ្លួន ក្នុងការបង្កើនពន្ធលើប្រាក់ចំណូលជាលើកដំបូង គិតចាប់តាំងពីទសវត្សរ៍ឆ្នាំ១៩៧០។

ប្រព័ន្ធផ្សព្វផ្សាយអង់គ្លេសជាច្រើន នៅថ្ងៃពុធ បានដកស្រង់សំដីសម្ព័ន្ធមិត្តរបស់លោក Starmer ដែលបាននិយាយថា នាយករដ្ឋមន្ត្រីនឹងតទល់ជាមួយបញ្ហាប្រឈមណាមួយ ប្រឆាំងនឹងការដឹកនាំរបស់លោក ដោយលោក Streeting និងរដ្ឋមន្ត្រីក្រសួងមហាផ្ទៃ លោកស្រី Shabana Mahmood បានដាក់ឈ្មោះបេក្ខជនដែលអាចជំនួសតំណែងរបស់លោក។

យ៉ាងណាក្ដី លោក Streeting បានប្រាប់វិទ្យុ BBC ថា៖ «ការផ្ដល់ព័ត៌មាននោះ គឺមិនពិតទេ»។ អំឡុងពេលនិយាយទៅកាន់ប្រព័ន្ធផ្សព្វផ្សាយ លោក Streeting បាននិយាយថា ការផ្ដល់ព័ត៌មានពីការប៉ុនប៉ងនេះ គឺជាការបរាជ័យដោយខ្លួនឯង ពីព្រោះពួកគេបានធ្វើឲ្យមានការចាប់អារម្មណ៍ ដែលថា លោក Starmer កំពុងបារម្ភពីការបាត់តំណែងរបស់លោក ខណៈដែលផ្ទុយទៅវិញ លោកផ្តោតលើការប្រឹងប្រែង ដើម្បីធ្វើចក្រភពអង់គ្លេសប្រសើរឡើង។

លោក Streeting បានប្រាប់ប្រព័ន្ធផ្សព្វផ្សាយ Sky News ថា៖ «ខ្ញុំនឹងមិនទាមទារឲ្យនាយករដ្ឋមន្រ្តីលាលែងពីតំណែងទេ។ ខ្ញុំគាំទ្រលោកនាយករដ្ឋមន្ត្រី ហើយខ្ញុំបានធ្វើបែបនេះ តាំងពីលោកជាប់ឆ្នោតជាប្រធានគណបក្សការងារម្ល៉េះ»៕