សារព័ត៌មានធំៗជាច្រើនលើពិភពលោកបានចុះផ្សាយព្រោងព្រាតពីភាពតានតឹងថ្មីបង្កឡើងដោយភាគីថៃលើកម្ពុជា ក្រោយមានសេចក្ដីរាយការណ៍ថាទាហានថៃបានបើកការបាញ់ប្រហារមកលើជនស៊ីវិលកម្ពុជានៅព្រំដែននៃប្រទេសទាំងពីរ។  

សារព័ត៌មាន NHK WORLD របស់ជប៉ុន បានរាយការណ៍អំពីក្រសួងការពារជាតិកម្ពុជា និយាយថា កងទ័ពថៃបានបើកការបាញ់ប្រហារនៅតំបន់ព្រំដែនកាលពីថ្ងៃពុធសប្ដាហ៍នេះ ដោយបានសម្លាប់ជនស៊ីវិលម្នាក់ និង៣នាក់ផ្សេងទៀតរងរបួស។

លោកនាយករដ្ឋមន្ត្រីកម្ពុជា Hun Manet បានថ្កោលទោសថៃនៅលើបណ្តាញសង្គម ដោយនិយាយថា ការវាយប្រហារនេះបានរំលោភលើច្បាប់មនុស្សធម៌អន្តរជាតិ។ លោកបានអំពាវនាវឱ្យមានការស៊ើបអង្កេតឯករាជ្យ។

សារព័ត៌មាន ប្រចាំថ្ងៃ Newsday របស់អាមេរិក ដកស្រង់សម្ដីរបស់នាយករដ្ឋមន្ត្រីកម្ពុជាដោយនិយាយថា អ្នកភូមិម្នាក់ត្រូវបានសម្លាប់ខណៈការបាញ់ប្រហារបានផ្ទុះឡើងកាលពីថ្ងៃពុធតាមបណ្តោយព្រំដែនដ៍តានតឹងជាមួយថៃ ខណៈបទឈប់បាញ់សម្របសម្រួលដោយប្រធានាធិបតីសហរដ្ឋអាមេរិក Donald Trump ដែលបានបញ្ចប់ការប្រយុទ្ធគ្នារយៈពេលប្រាំថ្ងៃរវាងប្រទេសទាំងពីរហាក់ដូចជាកំពុងដួលរលំ។  

ជាមួយគ្នានោះ សារព័ត៌មាន Anadolu Agency របស់ទួរគី បានរាយការណ៍ថា ជនស៊ីវិលកម្ពុជាប្រាំនាក់បានរងរបួសកាលពីថ្ងៃពុធដោយការបាញ់ប្រហារតាមបណ្តោយព្រំដែនជាមួយប្រទេសថៃ ត្រឹមតែប៉ុន្មានថ្ងៃបន្ទាប់ពីភាគីថៃបានផ្អាកកតិកាសញ្ញាសន្តិភាព។

ចំណែក សារព័ត៌មាន Washington Postរបស់អាមេរិក ក៏រាយការណ៍ផងដែរថា អ្នកភូមិម្នាក់ត្រូវបានសម្លាប់នៅពេលការបាញ់ប្រហារបានផ្ទុះឡើងកាលពីថ្ងៃពុធតាមបណ្តោយព្រំដែនកម្ពុជា-ថៃ ។

មិនខុសគ្នាដែរ សារព័ត៌មាន Aqreqator របស់ អាស៊ែបៃហ្សង់ បានរាយការណ៍ថា របាយការណ៍បឋមពីអាជ្ញាធរមូលដ្ឋានបានបញ្ជាក់ថា ទាហានថៃបានបាញ់ប្រហារលើជនស៊ីវិលកម្ពុជាក្នុងភូមិព្រំដែនព្រៃចន្ទ ខេត្តបន្ទាយមានជ័យ បណ្តាលឱ្យមនុស្សប្រាំនាក់រងរបួស។

កាសែត Washington Times របស់សហរដ្ឋអាមេរិកដែរ បានរាយការណ៍ថា ជម្លោះព្រំដែនកម្ពុជា -ថៃកាន់តែក្តៅគគុកម្តងទៀត ខណៈអ្នកភូមិកម្ពុជាម្នាក់ត្រូវបានរាយការណ៍ថាបានស្លាប់។

ការស្លាប់ដែលបានរាយការណ៍នេះបានកើតឡើងពីរថ្ងៃបន្ទាប់ពីទាហានថៃម្នាក់បានបាត់បង់ជើងម្ខាងដោយសារដើរជាន់មីន ខណៈកំពុងល្បាតតំបន់មួយផ្សេងទៀតាមព្រំដែន។  

Hindustan Times News ដែលជាកាសែតប្រចាំថ្ងៃភាសាអង់គ្លេសរបស់ឥណ្ឌា បានសរសេរថា មនុស្សម្នាក់ត្រូវបានគេរាយការណ៍ថាបានស្លាប់ និងបីនាក់ផ្សេងទៀតរងរបួសនៅកម្ពុជាស្របពេលពេលមានការប៉ះទង្គិចគ្នាឡើងវិញជាមួយថៃតាមបណ្តោយព្រំដែនមានជម្លោះ។

ការសែតជាភាសាអង់គ្លេសរបស់ទីក្រុង ម៉ាកាវ បានរាយការណ៍ថា នាយករដ្ឋកម្ពុជាបាននិយាយនៅលើបណ្ដាញសង្គមFacebook ថា លោកថ្កោលទោសការប្រើប្រាស់អំពើហិង្សារបស់ភាគីថៃលើជនស៊ីវិលកម្ពុជានៅភូមិព្រៃចន្ទនៅរសៀលថ្ងៃទី ១២ ខែវិច្ឆិកា ២០២៥ ដែលបណ្តាលឱ្យជនស៊ីវិលកម្ពុជាបីនាក់រងរបួស និងម្នាក់ស្លាប់។

សារព័ត៌មាន Reuters ក៏បានរាយការណ៍ផងដែរថា ជនស៊ីវិលកម្ពុជាម្នាក់ត្រូវបានសម្លាប់ ស្រប ភាពតានតឹងកើនឡើងជាថ្មីកាលពីថ្ងៃពុធសប្ដាហ៍នេះ ៕