ប្រធានគណៈកម្មការសហភាពអាហ្រ្វិក បាននិយាយកាលពីថ្ងៃពុធ ទី១២ ខែវិច្ឆិកាថា គ្មានអំពើប្រល័យពូជសាសន៍នៅភាគខាងជើងប្រទេសនីហ្សេរីយ៉ាទេ ដោយច្រានចោលការចោទប្រកាន់របស់ប្រធានាធិបតីសហរដ្ឋអាមេរិក លោក Donald Trump ថា «ចំនួនដ៏ច្រើន» នៃអ្នកកាន់សាសនាគ្រិស្តត្រូវបានសម្លាប់នៅក្នុងប្រទេសដែលមានប្រជាជនច្រើនបំផុតនៅទ្វីបអាហ្វ្រិក។

លោក Mahmoud Ali Youssouf បានប្រាប់អ្នកសារព័ត៌មាននៅអង្គការសហប្រជាជាតិក្នុងទីក្រុងញូវយ៉ក ថា «អ្វីដែលកំពុងកើតឡើងនៅភាគខាងជើងប្រទេសនីហ្សេរីយ៉ា ពុំមានអ្វីពាក់ព័ន្ធនឹងអំពើដ៏ឃោរឃៅដែលយើងមើលឃើញនៅក្នុងប្រទេសស៊ូដង់ ឬផ្នែកខ្លះនៅភាគខាងកើតសាធារណរដ្ឋប្រជាធិបតេយ្យកុងហ្គោទេ។

ក្រុមប្រដាប់អាវុធអ៊ីស្លាមជ្រុលនិយម Boko Haram បានធ្វើសកម្មភាពភេរវកម្មនៅភាគឦសានប្រទេសនីហ្សេរីយ៉ា ជាការបះបោរដែលបានសម្លាប់មនុស្សរាប់ម៉ឺននាក់ក្នុងរយៈពេល១៥ឆ្នាំកន្លងទៅនេះ។ អ្នកជំនាញសិទ្ធិមនុស្សបាននិយាយថា ជនរងគ្រោះភាគច្រើនជាជនមូស្លីម។

លោក Trump កាលពីដើមខែនេះបាននិយាយថា លោកបានស្នើសុំឱ្យក្រសួងការពារជាតិត្រៀមសម្រាប់សកម្មភាពយោធា «ឲ្យបានឆាប់រហ័ស» តាមដែលអាចធ្វើទៅបាន ប្រសិនបើប្រទេសនីហ្សេរីយ៉ា បរាជ័យក្នុងការបង្ក្រាបលើការសម្លាប់ពលរដ្ឋអ្នកកាន់សាសនាគ្រិស្ត។ ប៉ុន្តែលោកពុំបានផ្តល់ភស្តុតាងជាក់លាក់ណាមួយសម្រាប់ការចោទប្រកាន់របស់លោកទេ។