កំពង់ស្ពឺ៖ ដើម្បីកំណត់បានភាពច្បាស់លាស់ កាត់ផ្តាច់ភាពស្រពិចស្រពិល ក្នុង​ការ​ផ្តល់​សេវា​សាធារណៈ​ និ​ងការការពារសុខសុវត្ថិភាព សណ្តាប់ធ្នាប់ របៀបរៀបរយជូនប្រជាពលរដ្ឋ រដ្ឋបាល​ខេត្ត​តាកែវ ​និង​រដ្ឋបាល​ខេត្តកំពង់ស្ពឺ បានជួបប្រជុំពិភាក្សា ដើម្បី​កំណត់​ដែន​រដ្ឋបាល​​ទទួល​ខុស​ត្រូវ​នៃ​ខេត្ត​ទាំងពីរ។

ការជួបប្រជុំនេះ បានធ្វើឡើងនៅព្រឹកថ្ងៃទី១៣ ខែវិច្ឆិកា ឆ្នាំ២០២៥ នាសាលាខេត្តតាកែវ ក្រោម​វត្ត​មាន​ឯក​ឧត្តម​បណ្ឌិត វ៉ី សំណាង អភិបាលខេត្តតាកែវ និងឯកឧត្តមបណ្ឌិត ជាម ចន្ទ័សោភ័ណ អភិបាល​ខេត្តកំពង់ស្ពឺ និងមានការចូលរួមពីមន្ទីរ អង្គភាពពាក់ពន្ធ័ និងកងកម្លាំងសមត្ថកិច្ចទាំងបី នៃ​ខេត្ត​ទាំងពីរផងដែរ។

ឯកឧត្តមបណ្ឌិត វ៉ី សំណាង មានប្រសាសន៍ថា ភាពមិន​ច្បាស់​នៃ​ការ​គ្រប់​គ្រង​ដែន​រដ្ឋបាល​បា​ន​ធ្វើ​ឱ្យ​ការ​ផ្តល់​សេវាសាធារណៈ ទៅដល់ប្រជាពលរដ្ឋមានការលំបាក ការទប់ស្កាត់បទល្មើសនានា ខ្វះ​ការ​ទទួល​ខុសត្រូវ និងឆ្លើយដាក់គ្នាក្រោយមានបទល្មើសកើតឡើង។

ឯកឧត្តម​រំពឹងថា ក្រោយកិច្ចប្រជុំពិភាក្សាកំណត់ដែនរដ្ឋបាលខេត្តរួចរាល់ និងមានសង្គត់ភាព មន្ត្រី​ផ្តល់សេវាសាធារណៈ សមត្ថកិច្ចមានភាពងាយស្រួលក្នុងការផ្តល់ទទួល និងបង្ការ បង្ក្រាប ទប់​ស្កាត់បាននូវរាល់បទល្មើសដែលកើតមានឡើង ហើយជាមួយនោះ ពលរដ្ឋ​ក៏​មាន​ភាព​ច្បាស់​លាស់ ​ក្នុងការទៅសុំ និងទទួលយកការផ្តល់សេវាក្នុងមូលដ្ឋានរស់នៅរបស់ពួកគាត់ផងដែរ។

ឯកឧត្តម​បណ្ឌិត ជាម ចន្ទ័សោភ័ណ បានសាទរចំពោះការកំណត់ភាពច្បាស់លាស់នេះ នឹង​គ្មាន​ការ​ឆ្លើយ​ដាក់​គ្នាទៀ​ត គ្មានការលូកដែនសមត្ថកិច្ចទៀតទេ ហើយពលរដ្ឋក៏គ្មានភាពស្រពិច​ស្រពិល​ក្នុង​ការ​ស្វែងរកការផ្តល់សេវាសាធារណៈ ដែលខ្លួនរស់ទៀតដែរ។

ឯកឧត្តម បានបន្ថែមថា ការណ៍នេះ ពិតជាបានសម្រួល និងផ្តល់ភាពងាយ​ស្រួល​ទៅ​ដល់​មន្ត្រី​ពាក់​ព័ន្ធ និងសមត្ថកិច្ចក្នុងការផ្តល់សេវា និងការពារនូវសុខសុវត្ថិភាព សណ្តាប់ធ្នាប់ របៀប​រៀប​រយ​ដល់​ពលរដ្ឋជាប់ព្រំប្រទល់នៃខេត្តទាំងពីរ។

ទន្ទឹម​នោះអភិបាលខេត្តទាំងពីរ បានក្រើនរំឮកដល់ អាជ្ញាធរដែនដីនៅគ្រប់មូលដ្ឋានទាំងអស់ ដែល​ស្ថិត​នៅចំនុចជាប់ព្រំប្រទល់ និងសមត្ថកិច្ចត្រូវបង្កើនការយកចិត្តទុកដាក់ លើ​កិច្ច​ការ​ងារ​របស់​ខ្លួន ឱ្យទទួលបានប្រសិទ្ធិភាពខ្ពស់ ហើយបញ្ឈប់រាល់សកម្មភាព ដែល​ឆ្លើយ​ដាក់​គ្នា​ដើម្បី​យក​រួច​ខ្លួន​ក្រោយ​មាន​បទល្មើសកើតឡើង៕ អត្ថបទ បាន សុខរិទ្ធិ