មន្ត្រីជំនួយជាន់ខ្ពស់មួយរូបមកពីអង្គការសហប្រជាជាតិ (UN) បាននិយាយកាលពីថ្ងៃពុធ (១២ វិច្ឆិកា) ថា មនុស្សកាន់តែច្រើនឡើង ពោលគឺប្រជាជន ២នាក់ ក្នុងចំណោម ៣នាក់ នៅប្រទេសស៊ូដង់ ដែលហែកហួរដោយសង្គ្រាម កំពុងត្រូវការជំនួយយ៉ាងខ្លាំង និងជាបន្ទាន់។

លោក Tom Fletcher ប្រធានផ្នែកជំនួយមនុស្សធម៌ និងសម្រាលបន្ទុករបស់អង្គការសហប្រជាជាតិ បានប្រាប់សារព័ត៌មាន AP ថា ស្ថានការណ៍កំពុងក្លាយជា "គួរឱ្យរន្ធត់ខ្លាំងណាស់សម្រាប់ជនស៊ីវិល" ខណៈក្រុមជំនួយកំពុងលំបាកក្នុងការផ្តល់គ្រឿងផ្គត់ផ្គង់ដែលត្រូវការចាំបាច់ ដល់សហគមន៍។

យោធាស៊ូដង់ និងកងកម្លាំងគាំទ្ររហ័ស RSF ដែលជាគូប្រជែង បានឈានដល់សង្រ្គាមនៅឆ្នាំ២០២៣ នៅពេលភាពតានតឹងបានផ្ទុះឡើងរវាងពួកគេ។ អង្គការសុខភាពពិភពលោកបានឱ្យដឹងថា ការប្រយុទ្ធគ្នានេះបានសម្លាប់មនុស្សយ៉ាងតិច ៤ម៉ឺននាក់ ហើយមនុស្ស ១២លាននាក់ផ្សេងទៀត ត្រូវភៀសខ្លួន។ ប៉ុន្តែក្រុមជំនួយនិយាយថា ចំនួនអ្នកស្លាប់ពិតប្រាកដ អាចខ្ពស់ជាងនេះឆ្ងាយណាស់។

លោកស្រី Amy Pope ប្រធានអង្គការទេសន្តរប្រវេសន៍អន្តរជាតិ IOM បាននិយាយថា ខណៈដែលសង្រ្គាមនៅតែបន្តឆាបឆេះអស់រយៈពេលជាង ២ឆ្នាំមកនេះដោយគ្មានសញ្ញាបញ្ចប់ ធនធានមនុស្សធម៌ក៏ត្រូវបាត់បង់យ៉ាងខ្លាំងផងដែរនៅទូទាំងប្រទេស៕